د. فتحي الشرقاوي يكتب.. يا ترى مين اللي نفخك؟

ظاهرة خطيرة بين الولاد والبنات المخطوبين، أوامر على الفاضي والمليان منه (أيوه وحاضر ونعم)، على طول الخط منها، وكأنه جوزها وكأنها مراته ونسيوا إنهم لسه مخطوبين.

يا بنت ده مش جوزك علشان يعاملك كده، يا واد دي مش مراتك علشان تعاملها كده، كثيرًا ما يرتدي الخطيب الشاب ثوب أكبر من حجمه وبدل ما فترة الخطوبة تكون هادئة وسعيدة.. لأ نلاقيها كلها زعابيب وخناقات وخصومه وزعيق ولو دورت في قاموس حياة الواد خطيبها في تعامله معها مش هتلاقي غير أوامر ونواهي وبس، عن هذا الموضوع تحديدًا أتحدث.

ظاهرة ابتديت ألاحظها وأسجلها، تلاقي الشاب بيكلم خطيبته على طول بصيغة الأوامر والنواهي والسيطرة كأنه جوزها، ده حتى لو جوزها المفروض مايسيطرش عليها كده (البسي ده ماتلبسيش ده) (كلمي دي واقطعي مع دي)، (روحي هنا وماتروحيش هناك) (خاصمي دي.. صالحي دي) أنا مش قولتلك.. أنا مش حذرتك انا مش وجهتك.

إنت مين يا ابني إنت، إنت نسيت نفسك ولا إيه، مين اللي خلاك تعيش الدور بالشكل ده، أنت يدوبك لسه بتقول يا هادي في علاقتك بيه واسمك يدوبك مكتوب بالقلم الرصاص البهتان.

خلاص بقيت الأب المهيمن.
ويقيت الزوج المسيطر.
وبقيت الأخ المراقب.

يا سيدي النونو وننوس مامتك، لازم تعرف حجمك وحدودك، إنت مجرد خطيبها ولما تيجي عندك في بيتك يبقى فيه كلام تاني، مين اللي أعطاك كل هذه الأدوار والمسؤوليات، مين اللي كبرك ونفش ريشك كده، مين اللي اداك حجم اكتر من حجمك، مين اللي نفخك وحسسك إنك كده.

على العموم الغلط مش غلطك أنت، ده غلطة البنت التافهة اللي بتسمع كلامك والهايفة اللي بتنفذ أوامرك السطحية والهبلة اللي بتصدق أي كلام يتقالها من خطيب الغفله وتجري ورا تنفيذ كلامك، لازم تعرفي يا تافهه انه مش جوزك وبعدين لما انت بقيت كده قبل ما تتجوزيه يا ترى وضعك هيكون معاه ايه بعد ما ترتبطي بيه، وبعدين ترجعي تعيطي بعد الجواز وتقولي ده مستبد عرفتي دلوقتي يا نونوسة يا صغيرة سلسلة التعسف والإستبداد بتبدأ منين وامتى؟

افتكري انك أول واحده باركتي استبداده علشان ما ترجعيش تعيطي بعد الجواز وتصدعي دماغنا إنه عنيف ومستبد معاك.