د. فتحى الشرقاوي يكتب: أنا سايبالك البيت و رايحة لأمي

شوف هتتصرف إزاي.... وأنا رايحه عند ماما..لحد ما تعرف أن الله حق، وبنات الناس مش لعبة...

ساعتها ابقى تيجي تاخدني معززه ومكرمه

ياسيدتي..ركزي معايا شوية..

التسرع في النهاية الدراماتيكية دي.

بتاعة أفلام الأبيض والأسود...ممكن تكون سلاح ذو حدين.ممكن تكون بداية إنهيار العلاقة وممكن تكون بداية الإصلاح ، ده هيعتمد على مدى فهمك الدقيق لسمات شخصية جوزك،فط في زوج يعتبر تركك للبيت طاقة القدر واتفتحت له يعني روحتك زعلانه لبيت مامتك جاياله على الطبطاب..ساعتها تتاح ليه الفرصة يعمل في غيابك كل اللي نفسه فيه ، في الوقت اللي انت عماله تبكي وتنعي فيه حالك عند امك.وماليه الدنيا صياح وندب وبكاء تلاقيه هو اخر نعنعة مع المقاطيع زمايله قاعدين ومروقين وبيلعبوا بلاي شتيشن وكريزي 8 وبابجي ..

ومش بعيد شيشة تفاح ودومينو وطاوله ويجيبوا ديلفري من عند مؤمن..وبعدها يضربوا طبقين أم علي من عند كنافة وبسبوسة.

ويكملوا السهرة في أي قهوة بلدي، ولما حد يلومه ويعاتبه يطلع الأسطوانة المشروخة هى اللي مشيت أنا مامشتش حد زي ما هى راحت ترجع...كده..هتلاقي نفسك لابسه في وش الحيطة.ساعتها هتقارني بين كرامتك وبين بيتك ومكانك والله اعلم هتختاري ايه..

علشان كده ياريت موضوع تركك للبيت ده مايبقاش القرار الأول بعد اي تصادم مع جوزك... إلا لو كنت عارفة ومتأكدة ومتيقنه إن جوزك من النوع الحونين النحنوح المنحنح. واللي مايقدرش يسيبك ومايقدرش يعيش من غيرك وإنك ليكِ عليه دلال، ومايقدرش يبعد عنك كتير.