د. فتحي الشرقاوي يكتب: اكتئاب مابعد الولادة

الست اللي بتولد...الله يكون في عونها..ياريت تبعدوا عنها شويه وتتركوها في حالها وكفاية عليها اللي فيها مكفيها
مش هقول جروح في جسمها من أثر علية الولادة ، ولا هقول مش قادرة تمشي ولا تتحرك طبيعي زينا ولا هقول نَفسَها تعبانه علشان اضطراب صورة جسمها ، أنا هتكلم على أعراض الإكتئاب عندها لأن أزواج كتير لسانهم طويل ومعندهمش اي معرفة بإكتئاب مابعد الولادة معتقدين أن زوجاتهم اصبحن مريضات بالنكد والاكتئاب..
عزيزي الزوج..
علشان بس متقولش إن مراتك بقت مريضة كئيبة خلال التلات شهور الأولى بعد ولادتها ..ده شيئ عادي وعادي تماما
اولا...
بتكون حالتها المزاجية مترديةلا هى فرحانه ولا زعلانه لا هى مبسوطه ولا قرفانة...لو لقيتها كده ماتفضلش تبرر سلوكها بأسباب خارجيه ، سيبها في حالها وابعد إنت بس عنها شوية.
ثانيا..
يظهر عليها سلوك اللامبالاه وعدم الاستمتاع بأي حاجه يعني لو قالتلك (لأ ) على حاجه هى بتحبها عدي الموضوع وماتجادلش ولو قالت نعم على حاجه هى ماكانتش طايقاها ماتاخدش في بالك
ثالثا.
لما تلاقي شهيتها مفتوحه قوي وفاتحة التلاجه وقاعده جواها سيبها في حالها، ولو لقيت نفسها مقفوله عن الأكل برضو سيبها في حالها
رابعا..
لو لقيت مراتك نامت وانتم صاحين وصحيت وانتم نايمين سيبوها في حالها وماحدش يغلس عليها ويتفلسف ويقولها ليه
خامسا..
لو صوتت في وشك واتنرفزت عليك شويه، ياريت ماتكبرش الموضوع وتدخله في موضوع كرامه ولو لقيتها باردة في رد فعلها معاك يبقى تبعد عن وشها الساعة دي
سادسا..
لو شوفتها مش حاطالك لا ابيض ولا احمر ولا لابسالك اي حاجه، إبقى أعرف إن ده عادي في التلات شهور دول..
عاجبك الكلام ..ماشي..مش عاجبك يبقى روح نام عند الحاجة والدتك تلات شهور وبعدين ارجع لهاهتلاقيها زي الفل.