د. فتحي الشرقاوي يكتب: من أسوء أنواع الحب

أنا بحب فيك دي وبكره فيك دي وعاوز دي..ورافض دي
بص ياحبيبي...
أنا عمري ماهاكون غير واحد بس..والواحد ده غير قابل للقسمة إلا على واحد مش اثين ولا تلاثة.
عاجبك بيا كلي كده بدون تجزئة
اهلا وسهلا. مش عاجبك يبقى الباب اللي يفوت
عن الحب المشروط....اتحدث.
لو عملت كذا....أنا هحبك..
لو قولت كذا....أنا هحبك..
لو اتصرفت بالشكل ده..أنا هحبك
لو لبست الاستايل ده...أنا هحبك
لو اتكلمت بالأسلوب ده..أنا هحبك
لو خاصمت ده و صالحت ده..أنا هحبك
طيب السؤال بقى.
لو انت اللي عاوزه مني اعمله:
أنا اصلا مش عاوزه ومش طايقه وضد طبيعتي يبقى إيه العمل والموقف ساعتها؟
طبعا هتقولي مش هحبك والكلام ده معناه ايه، معناه إنك علشان تخليني احبك يبقى لازم أعمل اللي انا مش بحبه لأنك انت بتحبه وما اعملش اللي أنا بحبه لأنك أنت مابتحبوش طيب افترض معايا بقى إنك بتمنعني من حاجه أنا بحبها وعاوزها وبتمثلي حاجه كبيره قوووي ويمكن كمان مقدرش اتهاون ولا افرط فيها تفتكر إيه اللي ممكن يحصل في الحالة دي؟.
في الغالب هيحصل السيناريو ده..إنك هتعملها قدامه علشان يفضل يحبك ومن ورا ضهره هتعمل كل اللي إنت بتحبه وعاوزة يبقى خلقنا الازدواجية بأيدينا...عرفتوا دلوقتي أضرار الحب المشروط.
وعرفتوا الازدواجية بتيجي منين...وعرفتوا دلوقتي ازاي ابنك أو بنتك بتبقى قدامك بشكل وأسلوب وهيئة ومن وراك شكل تاني ،في الحالة ابحثوا عن الحب المشروط الموقفي وتفكوه.. ودوروا عن الحب الحقيقي الدائم المستديم الباقي
لو بتحبني حب حقيقي يبقى لازم تحب اختلافي معاك قبل إتفاقي بتحب عيوبي قبل مميزاتي مفيش حاجه اسمها احب دي ومحبش دي الكلام ده تقوله للجزار بتاعك، لما بتقوله أنا عاوز اللحمه الحمرا في حته والدهن في حته والعضم في حته والشغت في حته.