نجوى فؤاد: ربنا نجحني في الرقص.. وأرشح نيللي كريم لتقديم سيرتي الذاتية
كشفت الفنانة نجوى فؤاد، تفاصيل حالتها الصحية بعدما تعرضت لوعكة وذهبت على إثرها لأحد المستشفيات لإجراء بعض الفحوصات الطبية، بجانب الكشف عن اختيارها للفنانة نيللي كريم لتقديم سيرتها الذاتية في عمل فني.
وقالت نجوى فؤاد، خلال تصريحات تليفزيونية، إنها تعرضت لوعكة عادية وكل إنسان معرض، وأنا عملت أشعة على رجلي عندي تعب في ركبي والقطنية، ولجأت للنقابة من شهرين أو تلاتة، علشان يساعدوني الكشف والعلاج، والنقابة معندهاش استعداد غير لعلاج بسيط وتحاليل.
واضافت "الجمهور مبيشوفنيش على الساحة خالص علشان لأني مش قادرة أقاوم أني أقف وألبس واتمكيج وأظهر بلياقتي العادية، مش قادرة الحقيقة"، متابعة "معاش النقابة 600 جنيه بس، وأشرف زكي مالوش ذنب هو موظف في الأول والآخر، وأنا مكنش عندي رد غير أني أقوله أشوفك بخير وبشكره أنه اهتم بيا واتصل بيا".
وتابعت: "أشرف زكي عرض عليا أني أخد من فلوسه الخاصة لو محتاجة، قولتله لأ مستورة لغاية دلوقتي، ومعنديش مصدر دخل خالص، ودي حاجات بتبقى خاصة مقدرش أتكلم فيها والحمد لله مستورة"، مضيفة "الفن غدار وكل مهنة غدارة، والفن بيحب الفنان يكون بيبرق على طول وحالته السليمة على طول، وساعات بيكون في مطبات بيقع فيها الإنسان بتكون بإيد ربنا".
وتابعت: "أنا معتزلة الرقص بقالي 17 سنة، ولكن مش هعتزل التمثيل، وبيجيلي أدوار ولكني مش قادرة أقدم عمل جيد وأكون واعية من غير مسكنات وحقن، مش عايزة أتعب المنتج اللي بياخدني أجي أقوله في النص أنا تعبانة مش قادرة أكمل، والفن ولا أي شغلانة مفيش فيها كلمة أنا تعبان".
واضافت "ربنا قسملي الرقص ونجحت فيه، وربنا أراد أنه ينجحني في الرقص وشُفت فيه كل الأيام الحلوة، وحب الجمهور أكبر ثروة بالدنيا، وندمت شوية على قرار عدم الإنجاب، لأن في الظروف اللي إحنا فيها دي مين كان هيربي كويس معايا، أنا مكنتش متفرغة، وكل حاجة ربنا مقسمها وكله بيتنفذ من عند ربنا".
واستكملت "بحب فيفي عبده ودينا على المستوى الشخصي بعيدًا عن هما بيشتغلوا إيه، ودينا عاقلة ومتطورة، وفيفي دمها خفيف والكاريزما بتاعتها بتخلي اللي مبيحبش يحب، وأنا بحبها أوي أوي وهي لطيفة وعفوية ومش مصطنعة"، مضيفة "أختار نيللي كريم تعمل سيرتي الذاتية، بحب فيها كل حاجة، ربنا يوفقها ويسعدها ويخلي ليها ولادها، هي ست جميلة ولذيذة وفيها ميزات كتير الحقيقة".
