نانسي إبراهيم تكتب.. لاتحلب الثور 10 ساعات

مينفعش تقعد تحلب ثور ١٠ ساعات وإنت مقتنع تماما إنك هتاخد منه أحلى لبن ، أو تزرع ف أرض ميتة وتقول : " ليه مخضرتش !!! " ، أو تمشى ف طريق عكسى وتكتشف إنك ماوصلتش ، ولا ينفع تدخل فى الحيطة بدماغك وتقول : " أووووف دماغى اتفتحت .. والحيطة لسه متكسرتش ؟!! " ، ولا ينفع تلبس بدلة أكبر منك ب٧ مقاسات وتقول : " معقولة .. إزاى مش مناسبة " .

وف نفس الوقت ... ما ينفعش تبقى عايز حاجة بإستماتة وانت مش بتبذل أى مجهود للحصول عليها ، أو بعد بذل مجهود مضنى لإستخراج جوهرة ثمينة من قلب الجبل وبينك وبينها بس ١ سم تلم العدة وتقول : " خلاص ... يئست . "

لازم نشغل الSensor الإنسانى ، والحدس البشرى ونفكر بقلوبنا أحياناً .. ونحس بعقولنا .

نعرف إمتى نكمل ، وإمتى نقول كفاية ... إمتى نجتهد للوصول ، وإمتى نرحل لليأس .

فى أحيان كتيرة بنكون على وشك الوصول لكننا بإقتدار ، وبغشم بنلف ، ونرجع تانى لأتفه الأسباب ، أو لتملك الكِبر مننا ، أو لأن اليأس استوطننا ، أو لإعتقادنا إننا استنفذنا مرات المحاولة رغم إننا أصلا وفعلياً مابذلناش أى مجهود يذكر ، أو محاولناش كفاية .

قلة الصبر ، وإنعدام الرؤية ، وغياب البصيرة ، والإندفاع ، واليأس ، والغرور ، ومحدودية أو قصر نظرنا بيفقدنا الكثير ، ويخسرنا أكثر .

إعطوا كل شيىء حقه ووقته ومجهوده ، ولا تفقدوا الهمة سريعا حتى لا تضيعوا ما كنتم تحلمون بتحقيقه ، أو تفقدوا ما كنتم ترغبون بالحصول عليه وتمنيتم الوصول إليه .

{طولة البال ... تبلغ الأمل }.