الإعلامية أيتن شلبي تكتب: الايجار القديم شجون وهموم
ببساطة ومن الاخر احنا بنهدر القانون وشريعة العقد وكل المسلمات اللى في الحياة
ودلوقتي في شوية أسئلة مشروعة بخصوص قانون الإيجار اللي تم تمريره. في اصرار عجيب.. شوه الأمر وخلاه يبدو كمصلحة ومنفعة شخصية.
١ - والد المالك الحالي العقار او جده وقع عقد بقيمة ايجارية ثابتة من ٤٠ سنة مثلا.
وهو فاهم انها ثابتة.
رسمياً.. البرلمان يوافق على إخلاء وحدات الإيجار القديم لغير الغرض السكنيوان في قانون بيقول ان في امتداد للجيل الاول.. للابن او البنت الخ.. المقيمين في العقار.
هو ازاي بعد كده عايزين تهدروا عقد اتفق عليه اطرافه.. بارادة حرة.. بحجة الغلاء.. ولصالح بالغ مش طرف فيه؟
دا انهي مبدا قانوني يقول كده؟
يعني انا ممكن اشتري ارض النهاردة بمبلغ.. وبعد سنين.. ييجي حد يضغط بلوبي على المشرع.. ويطلع قانون وياخدها من ورثتي.. بحجة ان "تمنها دلوقتي بقى كذا"..؟
وهل دا يعني اننا بنهدر قيمة العقد كشريعة بلا عوار اعتراه؟؟
طب ما والدك لما اتعاقد زمان.. الألف والالفين خلو رجل.. كانوا فلوس وفلوس كتير.
الجنيه برضه كان قيمته كذا. لو عقار مؤجر من ايام عبد الناصر بخلو ٢٠٠ جنيه.. وايجار ٥ جنيه.. فالخمسة جنيه المصري كانوا يساووا جنيه دهب. بالضبط.
٢ - الأحكام القضائية النهائية اللي بتقر ورثة مستاجر في عقار بقيمة معينة...
قضية مثلا لورثة مستاجر واتحكم فيها نهائي في ٢٠٢١.
أحكام الدستورية العليا السابقة اللي بتجيز الامتداد كما هو للجيل الاول.
حنهدرها ونهدر قانون المحكمة الدستورية معاها.. وللا حنعمل ايه؟
حيحصل ايه؟
حيهدرها القانون ده؟
يعني البرلمان.. المشرع.. بيعلم العامة.. ان حكم القاضي بلا قيمة ونقضيها قعدات عرب ونشيل كفننا على ايدينا ونسم لبعض البهايم احسن؟
٣ - يا ترى درستوا مقدار الفلوس اللي حتتكلفها الدولة نفسها؟
تعرف ان في مقار لهيئات وشركات حكومية مأجرة وبتدفع مبالغ بسيطة من عشرات السنين. حتلاقي فروع لبنوك زي بنك مصر والاهلى وشركات وهيئات.
دي حيطردها المالك او بدل ما بتدفع ١٠٠ و٢٠٠ جنيه.. حتدفع مئات الالاف او الملايين شهريا؟
حصرت وحسبت؟؟ وللا ماشية بالحب؟
٤ - الست الغلبانة اللي عندها ستين سنة وفي اوضة ٢٠ متر شاملة حمام وايجارها ٥٠ جنيه ومعاشها ٢٠٠٠ جنيه.
حتنام لحضرتك هي وعشرات الالاف زيها في الشارع عشان نشجع السياحة والاستثمار؟
وللا حتدفع ١٠٠٠ ومتلاقيش تاكل ولا تتعالج وتطلع تلطم في فيديوهات وتشحت في الشوارع فتشجع برضه السياحة والاستثمار؟
وللا المفروض قدامها وقت.. تنزل تلاقي فيه شغل عند البهظ بيه.. تعبي كياس بودرة.. بعشرين او تلاتين الف جنيه شهريا.. عشان تسكن في ايجار جديد بنصفهم؟
٥ - حصرت كام مالك متضرر.. وكام أسرة حتتضرر واد ايه الخزانة حتتضرر واد ايه تبعات الموضوع عشان تعرف طبقا للقانون "تدرء الضرر اولى من جلب المنفعة"؟
وللا المشرع زي ما مفكرش في قيمة العقد بارادة حرة واهدره.. وتجاهل حكم القاضي واهدره.. حيهدر القانون نفسه بالمرة؟
٦ - حصرت وحسبت كمية الاشتباكات اللي حتحصل في التنفيذ.. لما تقول لواحد واسرته لم عفشك وعلى الشارع؟
وللا متوقع يقولك "حاضر" وينزل ينام على الرصيف هو ومراته وبناته؟
قست عبء الاشتباكات والجرايم اللي حتحصل على الاجهزة الامنية والقضائية.. واستعديت لها؟
٧ - ولو نجحت في رقم ٦. قست عدد المشاكل والتجمهر والناس اللي ملمومة في الشوارع.. واللي حيضم عليهم فئات وعناصر كلنا عارفينها.. ويكرروا لنا احداث محدش يحب تتكرر؟
حتحب الحدث ده؟؟ انا شخصيا مش حابب.
٨ - قست الفترة الجاية البلبلة وعدم اليقين اللي حيصاب ييهم الناس ويتحولوا لغل وكراهية أكتر من اللي هم فيه.. فيروحوا لحضن عدوك وقنواته يطبطب عليهم ويسممهم؟
٩ - قست مقدار الجريمة اللي حتنتشر لناس محتاجة توفر مأوى؟ كام واحد حيحاول في اسرع وقت يجيب فلوس بطرق غير مشروعة؟
قست ضغط دا على المجتمع وأمنه؟
١٠ - قست دا على الاستثمار والعمال وارباب الاسر اللي حتتمرد وتعمل اضراب وتثور عشان عايزة فلوس زيادة مش مفروض رب العمل يدفعها.. وتعطل مكن وانتاج وزرع وتخرب مصانع ومزارع.. او تسرق المستثمر ويسيبك ويطفش؟
١١ - حسبت كام مليون واحد حيبور اراضي اكتر ماهي بايرة.. او ياخد ملكية عامة ويبنى عليها عشة.. او يشوف له اي ماوى؟
جاهز لدا وحتتصدى له هو الاشتباكات الناجمة عنه؟ وحتتكلف في كل دا اد ايه ارواح بريئة وفلوس؟
١٢ - المالك حيرجع للمستأجر قيمة الصيانة اللي صانها للعقار هو وسلفه.. والدهان والحمام والسيراميك و.. و... وحتتحسب ازاي؟
وللا طالما العقد مهدر بقى.. يدغدغ الشقة ويسلمهاله على الطوب الاحمر.. واللي مش عاجبه يتفلق طالما احكام القضاء مهدرة؟
- سؤال اخير لان القايمة حتطول.
كل دا بسبب قانون ظرفه اصلا قرب ينتهي.. لان الخلو والايجار القديم وقفوا من اكتر من جيل كامل.. والعقارات مبتنتقلش للجيل الثاني وبياخدها المالك بالوفاة.. واثبات ان الورثة لهم سكن ومش عايشين مع المستأجر؟
في حد عند حضراتكم بيبحث النقاط دي؟؟ بيعمل النوع دا من الحصر ولابحاث والتوقعات؟
حد بيدرس تأثير القانون على المجتمع ونواحيه؟
