خطوات بسيطة تهزم وحش الاكتئاب.. ازاي ترجع لنفسك واحدة واحدة؟

في لحظات معينة من حياتنا، بنحس كأن الدنيا كلها بتضيق، وكل حاجة حوالينا فقدت لونها وطعمها. الحزن يسيطر، والمزاج يتقفل، ونبطل نحب حتى الحاجات اللي كنا بنفرح بيها، وساعات من كتر التعب النفسي مش بنقدر نقوم من السرير، ونحس إن مافيش دافع لأي حاجة.

الموقع العالمي Yourtango عرض مجموعة خطوات بسيطة لكنها مؤثرة ممكن تساعد أي حد يمر بنوبة اكتئاب أو شعور بالحزن العميق، واللي بتخلينا نرجع واحدة واحدة لنفسنا ونستعيد التوازن النفسي.

1. البداية من السرير.. خطوة تبدو صغيرة لكنها قوية
أول خطوة صعبة جدًا هي النهوض من السرير، المكان اللي بنلجأ له لما نحس بالأمان، لكنه كمان بيحبسنا وسط دوامة التفكير السلبي.

حاول تقوم، حتى لو ماعندكش خطة لليوم، اغسل وشك، غير مكانك، الحركة دي كفيلة تبعت لعقلك رسالة إنك بدأت تتحرك في الاتجاه الصح.

2. افتكر اللي كان بيسعدك.. وجربه تاني
في لحظات الاكتئاب، بنبعد عن كل حاجة كانت بتفرحنا. لكن لو رجعت لحاجة بسيطة كنت بتحبها – سواء خروجة، فيلم خفيف، موسيقى بتحبها، أو حتى رياضة خفيفة – هتلاقي فرق حقيقي. الأنشطة البسيطة دي بتزود هرمون الإندورفين اللي بيساعد في تحسين المزاج.

3. جسمك محتاجك زيه زي قلبك
النفسية مش هترجع لوحدها من غير ما نهتم بالجسم. نام كويس، كل أكل مغذي، اشرب ميه، وخلّي الشمس توصل لك حتى لو من شباك. جسمك السليم هيساعدك تسترد طاقتك النفسية واحدة واحدة.

4. ابعد عقلك عن دوامة السلبية
لو سبنا عقلنا فاضي، بيبدأ يضخم كل حاجة سلبية، ويعيشنا في وهم الفشل والعزلة. شغّل دماغك بحاجات مفيدة: كتاب، بودكاست، مسلسل، أو حتى حديث مع حد بتحبه. كل ما شغلت نفسك بحاجة إيجابية، هتقلل من تأثير التفكير السلبي.

5. لما الكلام يعجز.. الورق يسمعك
الكتابة ليها سحر، مجرد ما تمسك ورقة وقلم وتبدأ تكتب اللي جواك – حتى لو كلام مش مترتب – هتحس إن فيه حاجة اتفكت جواك. التعبير عن المشاعر بيخليك تفهم نفسك أكتر، ويمكن تكتشف حلول مكانتش واضحة قدامك.

6. اختار الناس اللي حواليك بعناية
أكتر حاجة بتفرق وقت الحزن هي الناس اللي بنحس معاهم بالأمان. ابعد عن أي حد بيقلل من إحساسك أو يحكم عليك. خليك وسط ناس بتتفهمك، وبتعرف تبقى موجودة من غير كلام كتير. الدعم الحقيقي مش شرط يكون بالنصايح، ممكن يكون بحضن أو وجود صامت بس صادق.