هجوم ناري على طريقة مخرجة فيلم مصري في مهرجان الجونة
شن رواد مواقع التواصل الاجتماعي هجوم ناري علي طريقة مخرجة فيلم مصري في مهرجان الجونة، وقال المنشور" أول حوار صحفي عملته في حياتي كان مع الفنانة الراحلة هند رستم سنة ٢٠٠٩، رحت بيتها في الزمالك وأجريت معها حوارا من أحب الحوارات لقلبي، بعد انتهائي من الحوار سألتني "أنت مربي دقنك كدة ليه؟"، فرديت وقلتلها "موضة"، قالتلي "احلقها عشان مش بحب الرجالة اللي بدقن"، فضحكت وقلتلها "هحلقها حالا"، فقالت: "برافو عليك إنك بتحترم أي وجهة نظر".
وأضاف المنشور" ليه بقى بحكي الموقف ده؟ علشان امبارح اتفرجت على فيلم اسمه "الفستان الأبيض" بمهرجان الجونة، والفيلم من بطولة ياسمين رئيس وأسماء جلال، ومعجبنيش الفيلم ولا مستواه وحسيت إنه لو كان اتعمل فيلم قصير كان وارد يبقى أفضل".
وأكمل قائلا" المهم النهاردة كان في مؤتمر صحفي لصناع الفيلم وأحد الزملاء الصحفيين سأل سؤال إن الفيلم أظهر الرجالة بشكل سلبي، هو قال وجهة نظره اللي ممكن تبقى صح أو غلط، وفجأة قررت المخرجة ومؤلفة الفيلم جيلان عوف اللي لسة بتقول يا هادي في مهنتها التهكم من الزميل وقالتله "اشتغل على السؤال".. والحقيقة إنه رد غير لائق من مخرجة بتقدم أولى أفلامها الروائية الطويلة اللي معجبش ناس كتير غيري، وبصراحة هي لازم تشتغل على نفسها أولا وشغلها ثانيا لعل وعسى نكسب مخرجة جديدة للسينما".
وختم حديثه قائلاً"وبالمناسبة قابلت المنتج محمد حفظي بعد انتهاء المؤتمر، وقلتله: "عيب إن مخرجة فيلمك تقول جملة زي دي، فهمها إن البداية مش حلوة"، والراجل كان لبق واعتذر"
