بحكم محكمة.. براءة مساعدة طبيب النسا فى قضية إجهاض السيدات بالجيزة

في تطور جديد، قضت محكمة جنح العمرانية بالجيزة، ببراءة المتهمة بثينة .ع، في قضية طبيب الإجهاض بالجيزة، من التهمة المنسوبة إليها بالاشتراك مع طبيب نساء وتوليد، في إجراء عمليات إجهاض للسيدات.

وقالت مساعدة طبيب النسا أمام جهات التحقيق " الدكتور هو صاحب العيادة وانا شغاله عنده كسكرتيره للمكتب بقطع التذاكر، واللي حصل إن نورا دي كان ليها معاد كشف عندنا، وقطعت كشف مستعجل وبعد كده دخلت عند دكتور صبحي ولما دخلت عند الدكتور خرجت كان عليها دم ولقيت دكتور صبحي بيقولي دي هتنزل تحت في الدور الأرضي بسرعة، وقالي نزليها تحت وخليها تستناني تحت عقبال ما انزلها.

وأضافت: نزلت فتحتلها الأوضة وقولتلها استني الدكتور صبحي لما ينزلك عشان هو كان نازل يعملها عمليه اجهاض بناءً على طلبها وممكن يكون مضاها زي ما بيمضي ناس كتير على إقرار بالعملية دي ان علي مسئوليتهم الشخصية وهو متعود إنوا على طول بيعمل عمليات دي في المكان ده اللي في الدور الأرضي و مجهزه، وبعد أنا ما دخلت نورا أنا روحت و معرفش حاجة عن الموضوع".

وتابعت مساعدة طبيب النسا المتهمة في قضية الإجهاض بالجيزة: "أنا عايزه أقول إن دكتور صبحي بيعمل عمليات إجهاض كثير جدا في المكان اللي تحت مش في العيادة بتاعته ودي حالات هو بيستقبلها بنفسه.. وأنا مليش دعوة بيها ومعرفش حتى حسابها ايه.. أنا كل اللي اعرفوا في المكان هو الكشف العادي 200 جنيه والكشف المستعجل ب 250 جنيه، لكن حالات العمليات الجراحية و الإجهاض هو اللي كان بيستلمها.. أنا مبعرفش عنها حاجة وكان بيدي فلوس لي رضا صاحب البيت عشان يسكت على اللي هو بيعملوا وبعد م اتمسك دكتور صبحي راح دخل رضا المكان تحت اللي في الدور الأرضي ونضف وشال كل حاجة".