يا شيطان.. وفاء مكي تنهار من البكاء وتفتح النار على ميار الببلاوي

انهارت الفنانة وفاء مكي، من البكاء على الهواء، بعد تصريحات ميار الببلاوي الأخيرة والتي حملت دليل براءتها في قضية تعذيبها خادمتين التي مر عليها 23 عامًا، موضحة: "كنت بتنامي إزاي وبتاكلي وتشربي إزاي وأنتِ ظالماني يا ميار الببلاوي، ومعاكِ دليل براءتي وكتمتِ الشهادة".

وقالت وفاء مكي خلال تصريحات تليفزيونية، وهي تبكي: "كنت بقول لها أنتي معاكِ دليل براءتي تعالي وقولي كلمة حق، كنت بنادي لك يا ميار وأقول لها تعالي أبوس إيدك تعالي قولي كلمة حق واشهدي واتقي الله وقالت أنا ما كنتش موجودة ولما رجعتِ بعد 6 شهور وعرفتِ إني أخدت 10 سنين سجن ليه ما رُحتيش للنقابة وساعدتيني وبرَّأتيني وساعدتيني أخرج من السجن، على الأقل علشان ضميرك يبقى مرتاح ولحد امبارح طلعت عينيَّ علشان تنطق بالحق".

وتابعت: "أقسم بالله العظيم ما أعرفش إن حد هدد ميار الببلاوي حال شهدت في قضيتي وقالت كلمة الحق، بس لو حد هدِّدها تبرأ ذمتها من الله علشان ترتاحي وفي الآخرة هتقابل ربنا إزاي؟ هتواجهي ربنا إزاي؟ اللي بيكتم الحق دا شيطان أخرس".

وأضافت: "ما عنديش حاجة أقولها غير الحمد لله على السراء والضراء، ميار الببلاوي كان فرح ابنها يوم الإثنين اللي فات وسيد شعراوي ضغط عليَّ وقال لي تعالي نروح لها يمكن تطلع تقول شهادة الحق وهي ما كانتش عايزة تطلع تتكلم وتقول شهادة الحق، وبقينا ماشيين ورا اللي تقول عليه نقول عليه ماشي بحيث إنها تطلع تتكلم وتقول كلمة الحق وبقول لها ما صعبتش عليكِ وأنا محبوسة ظلم؟".