سلوى عثمان: الشغل رقم واحد في حياتي.. وحطيت بند في عقد زواجي أني ما سبهوش

تحدثت الفنانة سلوى عثمان عن زيجاتها، مشيرة إلى أنها تزوجت مرتين حيث تزوجت للمرة الأولى وانفصلت بعد سنوات قليلة ومن ثم تزوجت من زوجها الحالي منذ 15 عامًا.

وقالت سلوى عثمان: شغلي بالنسبة لي خط أحمر مع أي حد بتجوزه وبتفق أني عمري ما هسيب شغلي وحطيت بند في عقد زواجي من زوجي الحالي علشان الشغل والمأذون سألني في شرط عاوزة تحطيه في العقد قلت له أني ما أسيبش شغلي.

وأضافت: زوجي الحمد لله حابب الشغل بتاعي ومتفهم، وعارف أني بكون مشغولة في رمضان وساعات بنبات في الشغل وعنده فكر ومحتوي الموضوع، ومع ذلك أنا مش بقصر معاه في البيت مش معنى إني مشغولة ما عرفش حاجة عن هدومة وشغله لكني عندي ترتيب في حياتي أني ما أقصرش.

الشغل رقم واحد في حياتي
وواصلت حديثها قائلة: الشغل رقم واحد في حياتي، وبحاول أيضًا أن زوجي يكون رقم واحد وبكون مسؤولة عن كل شيء يخصه من لبس وأكل.

وأكدت سلوى عثمان أن التفاهم هو الذي يعمر الزواج أكثر من الحب، موضحة: الحب ممكن يروح لأسباب مختلفة لكن لو متفاهمين هيقدروا على الحياة الزوجية لأن الحب ممكن يضيع بأي شكل.

وأكملت حديثها قائلة: لازم الخلافات تكون متقبلة بين الطرفين لأني ممكن أقبل عيوب في جوزي واحدة تانية ما تقبلش بيها والعكس لأننا مش ملايكة وكلنا عندنا عيوب وكل واحد له شخصيته ولازم يكون فيه تفاهم، وفيه حد لازم نقف عنده من غير ما نعديه وده نوع من التفاهم.

واختتمت قائلة: في حاجات ممكن تعديها وحاجات لأ، أنا مثلًا عصيبة أكتر منه وهو بيكون هادي وساكت وهو لما يتعصب بهدى كل واحد فينا بيستحمل التاني، لكن العصبية ليها حدود ما ينفعش يدخلوا في مناطحات وألفاظ مش لذيذة.