باسم شريف يكتب.. دميانة فضحت كذبهم واستبدادهم.. الوسط الفني

من كتر ما التنجيح والتصعيد للنجومية في بلدنا بقى فج وبالعافية وبالمزاج دون أي اعتبار للاستحقاق أو الموهبة، بقى اللي بينجح براهم ومن غيرهم ورغم أنفهم بيسببلهم شعور انهم (اتغفلوا)، وبيتعصبوا وبيزعلوا وبيكرهوا الناجح ده اللي عدي من ورا ضهرهم ونجح بدون إذنهم ورغبتهم، وكأن النجاح في مصر لازمله صك أو تصريح أو دمغة أو موافقة أو تأشيرة على ورقة فلوسكاب من اللي بيتمضي عليها بالجملة الأكلاشيه المشهورة (ليس لدينا مانع مع اتخاذ الإجراءات المتبعة).

أنا لسه ما اتفرجتش على فيلم "ريش" بس بيني وبينكم وكلام في سركم يعني، أنا قلبي فرحان واتمليت طمأنينة بالرسالة اللي ربنا بعتها لكل اللي محبطين وزعلانين وقلقانين من ممارسات الظالمين الأشرار اللي فاكرين إن كل حاجة في ايديهم هما بس، ربنا موجود ياعم، شايف وعارف ومطلع، الرزاق ذو القوة المتين، واه يا جماعة مش هنكدب عليكوا احنا شمتانين وفرحانين فيكوا واثلج صدورنا وطرى على قلوبنا وبرد نارنا شكلكوا وانتوا متبروزين في كورنر الجهلة والمتخلفين والفاشلين، وصولا لانكم فاسدين ومفسدين وجزء من فساد المنظومة الفنية، وفرحانين أكتر بانهياركم قدام الجمهور العادي حتى لو من خلال السوشيال ميديا فقط، اللي من إيجابياتها انها كاشفة وفاضحة وخلت الناس أقدر على التفكير والتحليل والتمييز والفرز والتدقيق.

وبتوقع في المرحلة اللي جاية انهيار أسماء كتير مهمة في الوسط الفني -سواء من القدامي أو اللي متصعدين قريب بالعافية- قصاد حالة الوعي اللي بدأت تظهر، والتغير النوعي اللي طرأ على علاقة المواطن المتفرج العادي بالنجم اللي بيتفرج عليه وبيسمعه، وأخيرًا الحيوانات مش كل اللي بيتحطلها بتاكله، انت بقى متصور إن المصريين أقل من الحيوانات وأي خلقة هتحطهالهم على الشاشات طول الوقت هيبلعوها في خضوع وبؤس؟، وصاحب الخلقة دي هيعدي معاهم وهتعملهولهم نجم بالعافية؟ انا لا أظن، وإن حدث ذلك، فهيبظلك من تحت الأرض، ويعدي من تحت دقنك مخرج بفيلم بممثلين يشقلبوا الدنيا ويبقوا ترند والنَّاس تعرفهم، وانت لا حول ليك ولا قوة، وهتاخد في الغالب رد فعل أرعن وأحمق فهتبقى زي اللي جه يكحلها عماها.

"ما كان لك سيأتيك على ضَعفك، وما ليس لك لن تناله بقوَّتك، وعزتي وجلالي لأرزقن من لا حِيلة له، حتى يتحيَّرَ أصحابُ الحِيَل".