في ذكري ميلاد منيرة المهدية.. أول ممثلة ومخرجة مصرية

 



اسمها الحقيقي زكية حسن منصور، اتولدت في قرية المهدية بمحافظة الشرقية، ومن القرية جه اسمها بعد الشهرة وبعد ما اشتغلت بالفن واختارت لنفسها اسمها الفني "منيرة" المهدية.



منيرة عرفت معنى اليتم بدرى، ومع ذلك كانت بترفض دايما أنها تستسلم لأى حاجة تعطلها عن تحقيق حلمها وهو انها تبقى نجمة ومشهورة، وخصوصا بعد ما بدأ الكل يقنعها ان صوتها حلو ومفيش زيه، ومش بيتكرر غير كل 100 سنة مرة.



المهم أن منيرة واول ما بقت قادرة انها تقف على رجليها وتغنى قدام جمهور حقيقي، اشتغلت مطربة فى الافراح والحفلات اللى كانت بتتعمل فى الزقازيق، لحد ما فى يوم واحد ابن حلال صاحب ملهى صغير ومحندق فى القاهرة، سمع صوتها، فراح لها بعد الوصلة ونصحها أنها تسيبها من الزقازيق والشهرة الصغيرة اللى ممكن تحققها فيها، وتنزل مصر ام الدنيا "القاهرة يعنى".



مرت الايام بسرعة، ونزلت منيرة القاهرة، وبدأت تشتغل فى ملاهى صغيرة، لحد ما بدأ صيتها يذيع فى الأماكن الكبيرة والمهمة، وواحدة واحدة لقت نفسها بتغنى فى حفلات كبار الاعيان والعائلات الكبيرة والقصور اللى فيها خدم وحشم مالهمش عدد.



النجاح الكبير اللى حققته منيرة المهدية، خلاها تفتح ملهى خاص بيها، وبعد فترة الملهى اتحول لملتقى رجال الفكر والسياسة والصحافة، وده طبعا لان منيرة كانت صاحبة شخصية قوية وقيادية، لدرجة ان الانجليز مقدروش يقفلوا لها الملهى لما بدأت تتكلم فى السياسية وتقدم مسرحيات تدعم بيها ثورة 19، ورغم ان الانجليز وقتها كانوا بيقفلوا اى ملهى او مسرح يردد بس اسم سعد زغلول الا انهم جم لحد منيرة وعملوا نفسهم من بنها.



بعد الغناء بقى قررت منيرة المهدية أنها تكشف عن موهبة جديدة مكنش حد واخد باله منها، وهى التمثيل، فوقفت لاول مرة على المسرح مع فرقة عزيز عيد، وقدمت دور راجل اسمه "حسن" وكانت أول ست مصرية تقف على خشبة المسرح، ولو اتفاجئت من دى، فخد دى كمان هدية : منيرة المهدية كانت اول مخرجة مصرية، واخرجت مسرحيتين لوحدها.



شهرة منيرة المهدية اتخطت حدود مصر، وبقت مطلوبة فى دول كتير، ومن كتر ماهى مشهورة فى سوريا، صاحب شركة دخان هناك، قرر أن يستغل شهرتها وحط صورتها على علب السجاير عشان يبيع اكتر ، وده اللى حصل فعلا.



اعتزلت منيرة المهدية الحياة الفنية فى نهاية العشرينات ورجعت تانى سنة 1948، بس لما رجعت كان الوضع تغير، وأم كلثوم كانت بتصول وتجول ومدغدغة الدنيا، فحاولت منيرة أنها تواجه كل التغيرات الجديدة بس فشلت ومن هنا خدت أصعب قرار فى حياتها وهو انها تعتزل الفن والشهرة لحد ما ماتت فى 11 مارس عام 1965.