لواء د. أحمد توفيق يكتب : ”عقوق الآباء.. مأساة اجتماعيه نعيشها ”

من أكثر الأزمات انتشارا في هذا الزمن عقوق الآباء..نعم قرأتها صح الآباء وليس الأبناء ..فالأب الذي يظن أنه رجل جامد أوي وبدون قلب ولا مشاعر تجعله لا يصرف على أبنائه اللي من لحمه ودمه هو أب عاق بمعنى الكلمه.. الأب الذي لا يخاف على شكل أبنائه بين الناس و شكله هو في عمله لما الناس تعرف إن أم أبنائه بتجري وراه فى المحاكم عشان أساسيات حياه أبنائه يبقى أب عاق، أكيد لا تخاف من ربنا ولاعامل حساب اليوم اللي تقابله فيه وهيسألك عن رعيتك؟ ولا تخاف دعوة المظلوم الت ليس بينها وبين الله حجاب ..اللى فاكر نفسه ابن ناس وراكب عربية ولابس ساعة سينيه وماسك موبايل أحدث موديل و خارج و بيتفسح ويتصور ومبسوط وأبنائه محتاجين هو أب عاق..

على فكرة السيدات بتعرف تصرف على أبنائها تحت أى ظرف..أنا أعرف سيدات كتير بتشتغل شغلانة وانتين وتلاتة عشان تصرف على ولادها وقدروا يعلموهم أحسن تعليم ويكونوا في مراكز مرموقةوأحسن من بيوت كتير فيها مايطلق عليهم رجالة ..الست وقت الأزمة بتبقى أرجل من اللي في البطاقة ذكر، ..قوامة الرجال بالانفاق والاعالة والقيام على امور اسرته هذا هو الشرع..

لكل "رجل" فاكر نفسه أب علشان له ابن شايل اسمه بس مش شايل همه وراميه لأمه.. أنت خسرت الدنيا والآخرة .. ولو اتجوزت تانى الست اللي هترضى بيك وهى تعلم انك رامي لحمك هتبقى رخيصة زيك وحاتندم أشد الندم مسألة وقت..ابنائك احتاجولك وهم ضعاف عملت ايه؟ ..بعتهم؟هييجى اليوم اللى هتضعف فيه وتحتاج لهم.. وساعتها هتعرف حجم خسارتك.

تحيه للرجل اللي طلق مراته بس لسة شايل مسئولية أبنائه..و لعنة الله على الشخص اللي أبنائه محتاجة وهو مستهبل ومنفض وفاكرها شطارة !!

وأختم حديثى بقول النبى صلى الله عليه وسلم: "كفى بالمرء إثمًا أن يضيع مَن يعول".

‏