سونيا الحبال تكتب.. أنا مبقبلش العوض

لما تكون عندك أزمة أو مشكلة أو فقد وحد يقولك ربنا يعوض عليك، ايه العوض اللي انت منتظره او هما فاكرين انك منتظره، فاكرين انك منتظر تعويض نفس الشيء، مع ان العوض دائمًا الأفضل مش نفس الشيء، بل التعويض هو تعويض نفسك.

* يعني ايه العوض؟!

العوض انك تحب نفسك أكتر من أي حاجة فقدتها، العوض انك متبصش وراك بص قدامك، بس لأعلي الجبل، بص للسما، العوض انك تكون راضي جدًا عن الفقد، لأن الفقد بيسيب فراغ، استغل الفراغ ده وحط مكانه حاجة حلوه أحلي من اللي فات، العوض انك تعرف حكمة الفقد، وان ربنا بيشيل حاجه ويجبلك حاجه احلي، العوض هو عوض نفسك، هو عوض ذاتك، هو عوض قلبك وعقلك، العوض مش دائمًا حاجه، ممكن العوض يبقي شعور رضا وتسامح وتقبل، عارفين اما حد يخبط عربيتك ويقولك هعوضك وتقول بأعلي صوت (انا مبقبلش العوض)، انا بحب الناس دي أوى رغم ان ده حقه، لكن هو واثق إن العوض مش مادي، العوض عنده رضا .. رضاااا.. رضااا.

وانتظار عوض السما مش عوض البشر، استعوضوا ربنا في اللي فات، وانتظروا عوض السماء وشوفوا الجبر بعد الصبر.