مروة نايل تكتب: أفردها ماتكشكشهاش !
احد ملوك الهند سأل حكيم ان ينقش على خاتم له جمله اذا قرأها وهو حزين فرح , واذا قرأها وهو سعيد حزن . فنقش على الخاتم :" هذا الوقت سوف يمضي " .
وزي ماقال عمنا صلاح چاهين:غمض عينيك وامشي بخفة ودلع، الدنيا هي الشابة وإنت الجدع ، تشوف رشاقة خطوتك تعبدك، لكن إنت لوبصيت لرجليك تقع ، وعجبو ! الدنيا، بس مش من النوع اللي بيركن العربية على الخط الأبيض، ولا اللي بيشرب قهوته بوش مظبوط،دي شابة متقلبة، صوت ضحكتها عالي ومجلجل، لابسة كوتشي أبيض عليه رسومات بالألوان،وممكن أميجو اللي كان بينوّر قبل تخفيف الأحمال، راكبة سكوتر في نص شارعك اللي دايمًا زحمة، ترشك برغاوي صابون، وتطلع لسانها تاخد سيلڤي وتكمل ، وانت واقف رسمي نظمي،ولا اللي في حضرةسلام وطني يوم عيد قومي، البدلة مكويه ، وأنت منشّي ،بس جواك منعكش و مكرمش ، ولا مكوة رجل تقدر تفردك ، شايف نفسك الجدع، وشايل الدنيا على ضهرك ، ولا شيالين المحطة، كأنك متعاقد مع الكون إنه يمشي حسب جدولك، مراقب نفسك كأنك موظف أمن داخلي في شركة مش بتوزع أرباح أصلًا، بتراقب حياتك بمنظار عسكري، وتخطط لكل شيء من أول خمسينة الشاي لحد وصيتك الأخيرة.
لكن تعالى أنا أقولك كلمتين في ودنك ، ، وده مش كلام في قعدة على قهوة، لكن علم نفس بُحت فيه الحناجر واتلدلت ليه الألسن ، واتخرمت منه ميكروفونات ، كل ما تحاول تسيطر على الحياة أكتر، بتفلت منك أكتر،زي اللي بيجري ورا حمامة في حديقة عامة، كل ما قرب، طارت، وكل ما طنش ، لقاها واقفة على كتفه. العين اللي مركزه تشوف كل حاجة، ما بتشوفش نفسها، كده زي مابيقول المثل الياباني : "العين التي ترى كل شيء لا ترى نفسها." الرايق الإنجليزي ألدوس هكسلي، شكله يقولك موظف أرشيف في مصلحة من بتوع مدام عفاف اللي في التالت، بس لابيزغرلك من تحت النضارة كعب الكوبايه ، ولا بيشخط ويقولك فوت علينا بكره ياسيد،وبرضه مش بتوع "خد الحياة بجد"، الحاج هكسلي كتب في كتابه "بوابات الإدراك" ،عن ظاهرة "الجهد المعكوس'، مش ظاهرة جوية، ولا حتى موضة إنستغرام، ده قانون نفسي بيقول: "أكثر ما يمنعك من نيل شيء، هو محاولتك المفرطة للحصول عليه."،يعني لو حاولت تجيب النوم غصب عنه ، بينام هو وانت تصهلل، ولو حاولت تتصرف بعفوية مقصودة، تبان بتأڤور وتمثل ، أو زي اللي بيضحك على نكتة قالها هو من خمس دقايق. وصدق الكاتب التشيكي فرانز كافكا لما قال: "إذا كان هناك ما هو أشد خطورة من الإفراط في المخدرات، فمن دون شك هو الإفراط في الوعي وإدراك الأشياء." ولو كنت من الناس اللي بتستوعب الدنيا زيادة عن اللزوم، أحب أقولك إن فيه قول مأثور بيقول: "الحزن يصيب فقط أولئك الذين يستوعبون."
ودي حقيقة، لأن شدة الإدراك بتتعب، بل قد تكون لعنة، وده مش رأيي، ده فيودور دوستويفسكي بنفسه اللي قال: "أقسم لكم بأغلظ الأيمان أيها السادة أن شدة الإدراك مرض، مرض حقيقي خطير." وفي العلاقات، الكارثة بتبقى أعظم، الست المسكينة اللي فاكرة إنها لازم تكون Google Maps العاطفي لحبيبها، أو الأم اللي بتستدعي كل الكوارث المحتملة لو ابنها مشي حافي في البلكونة، من زكام لبرد لجرح ، لحد الوقوع من على السور ، بتنتهي غالبًا مرهقة، محروقة، وبتشم ريحة الفشل من فوق سقف البيت وهي بتحاول "تحب أكتر".
بس إميل سيوران له رأي أبعد، وبيقول: "الوعي لعنة مزمنة، كارثة مهولة، إنه منفانا الحقيقي، فالجهل وطن، والوعي منفى."، يعني اللي فاكر إن المراقبة المستمرة والوعي الزائد هينقذ العلاقة، غالبًا هيكون أول الغرقى. الدنيا الشابة المتدلعة ما بتحبش الضغط، بتحب الرايق، اللي يديها مسافة تتنفس فيها، اللي لما يحب، يحب بهدوء، ويغلط وهو مبتسم، ويعذر من غير جدول زمني. تعالَوا نفهمها بلغة وفلسفة المصريين: لما تبالغ في محاولة إنك تكون "كل حاجة" ومحور الكون للي حواليك، غالبًا بتطلع ولا حاجة لنفسك،ولما تضغط على الناس بحجة الحب، غالبًا بتخنقهم بحنانك. وبرنارد شو قالها بصراحة: "إن أكثر الأشياءِ التي يرغب الناس بمَعرفتها هي الأشياء التي لا تخصّهم."، يعني بلاش تحشر مناخيرك في الفاضيه والمليانه . القصة مش إنك تبطل تحاول، لا سمح الله، إنا مش بعمل حمله اعلانيه بروج للكسل وللصهينه واللامبالاة ، اناة بقول حاول، بس من غير ماتتشنج وتاخد الأمور على صدرك ، امسك العصاية من النص، وسيب طرفها للدنيا تمسكه معاك. قال الله تعالى في قصة يوسف عليه السلام، لما اخواته اتهموه ظلم وهو عزيز وآمين على خزائن الأرض ،"قَالُوا إِنْ يَسْرِقْ فَقَدْ سَرَقَ أَخٌ لَهُ مِنْ قَبْلُ فَأَسَرَّهَا يُوسُفُ فِي نَفْسِهِ وَلَمْ يُبْدِهَا لَهُمْ" [يوسف: 77] يعني عرف، بس سكت، فهم، بس ما فجرش الدنيا، ولا اعتقلهم ، رغم أنه كان عزيز وآمين حفيظ على خزائن الأرض ، علشان يثبت إن ده مش ضعف، دي عبقرية الهدوء.
وخلّي عندك شوية "تغافل اختياري".
اللي هو فن إنك تشوف الغلط ومتكلمش، تسكت عن الكلمة اللي حتوجع، وتعدّي الغلطة اللي مش مستاهلة محكمة جنايات. و في حديث أم زرع الذي رواه البخاري ومسلم عن عائشة رضي الله عنها قالت: جلس إحدى عشرة امرأة فتعاهدن وتعاقدن أن لا يكتمن من أخبار أزواجهن شيئا. عندما قالت إحداهن واصفة زوجها: "زوجي إذا دخل فهد، وإذا خرج أسد، ولا يسأل عما عهد." يعني مش كل حاجة لازم تتحاسب، ولا كل سؤال له لزمة، وقال الإمام الشافعي: "الكيس العاقل هو الفطن المتغافل."، يعني الذكي مش اللي يراقب ويراجع كل تفصيلة، إنما اللي يعرف ويسيب. وقال الحسن البصري: "ما استقصى كريم قط." يعني الكريم مش اللي بيدقّق في كل صغيرة، بل اللي بيسيب حاجات تمر عشان الصفاء يفضل. ولو لسه نفسك في حكمة تختم بيها المقال ده وتكتبها على باب التلاجة، خد دي: "إذا هِبت أمرًا، فَقَع فيه." يعني لو خايف من حاجه اعملها ، وده مش معناه ارمي نفسك من الشباك لو بتخاف من المرتفعات، المعنى أعمق من كده بكتير ،المعنى هو، خوض الحياة بلا فزع، حب من غير ماتخنق، نام من غير ميعاد لو مفيش حاجه تجبرك على النوم والصحيان بمواعيد ، اضحك حتى لو مش على نكتة. وأخيرًا، مش لازم تفهم كل حاجة،أينشتاين بتاع الفهم كله قال: "ليس كل شيء يستحق أن يُفهم حتى آخره." وسيب الدنيا الشابة المجنونة تقود السكوتر، وانت وراها… بس خليك الجدع، مش السواق.
