وفاء نادر.. ساهر وإسلام يحتفلان بعيد زواجهما بالفستان والبدلة على الكرسي المتحرك

في لحظة وفاء نادرة، تواجه العلاقات الزوجية العديد من التحديات التي تختبر مدى قوتها أو ضعفها، وبعض العلاقات تصمد وتثبت نجاحها، بينما تفشل أخرى.

قصة ساهر سلامة، ابنة كفر الشيخ من ذوى الهمم، تعكس قوة الحب والتفاهم في وجه الصعاب.

ساهر تعتمد على كرسي متحرك يساعدها على التنقل ومواجهة التحديات، وزوجها إسلام حمدي عاشور، ابن خالتها، كان دائماً بجانبها منذ بداية قصة حبهما التي تكللت بالزواج ونتج عنها طفلتان.

تحدثت ساهر سلامة، خريجة معهد الفني التجارى، وهى ربة منزل عن قصة حبها لزوجها قائلة :"أنا وابن خالتي عايشين فى محافظتين مختلفين وأول مرة نشوف بعض كان من 17 سنة حبينا بعض وواجهتنا صعوبات إننا نتخطب بس الحمد لله حصل واتخطبنا 5 سنين واتجوزنا ومعملناش فرح لأن والدتى توفيت قبل الفرح بشهرين ".

وتابعت: "أكتر حاجه حبيتها فيه وخليتنى اخترت أكمل معاه، إني حسيت إن هو الوحيد اللي لما ببص فى عينه بشوف نفسي كاملة مش ناقصني حاجة وبيعاملني كويس أوي وبيقف جنبي أكتر من أي حد فى حياتي ومعززني قدام أهلي وأهله، وطبعا مجتمعنا قاسي أوي مع الظروف دي حتي أقرب الناس لكن هو حاجة تانية وأكتر حاجة خليتنا نكمل الحب اللي بينا و ده اللي مهون حاجات كتير أوي صعبة فى حياتنا، خصوصاً أن بيحصلي أزمات صحية كتير، وتربية بناتي "سلا و تلا".

رغم زواج ساهر منذ سنوات ولوفاة والدتها لم تقم حفل زفاف، حرصت على عقد جلسة تصوير مع زوجها بفستان زفاف بمشاركة طفلتيها والتي انتشرت على مواقع التواصل الإجتماعى ونالت العديد من التعليقات الإيجابية والتي تمنت لهما دوام السعادة وراحة البال وتحدثت عن جلسة التصوير قائلة:" كنا حاضرين حفل خطوبة، فقررت أشترى فستان وأعمل سيشن لأن عيد جوازي كان قرب و كان نفسي أعمل سيشن وأتصور مع بناتي وجوزي و بالصدفة حصل إنتشار للصور بالطريقة دي وكأن ربنا بيعوضني بطريقة ما عن كلام كتير مش بيريحني ونظرات كتير بتستفزني .. الحمد لله"

وتحدثت ساهر عن سبب إصابتها والتي جعلتها تلازم الكرسى المتحرك حيث قالت :" أنا عندي شلل أطفال وكنت بمشي بجهاز تعويضي وحصلي كسور فى رجلي آخرهم كان مفصل الفخذ وقعدت ٦ شهور مش بتحرك وكان وقتها المفروض أعمل عملية بس مكلفة أوي ومش مضمونة، ومقدرتش ألبس الجهاز ولا قدرت أخف من الكسر لأنه أتلحم غلط، فكان لازم اقعد على كرسي عشان أقدر أكمل حياتي، بقالي ٣ سنين بستخدمه والحالة معقدة شوية، والحمد لله أنا متكيفة مع الوضع رغم التحديات وأنا عملت ١٦ عملية عظام طول حياتي و ماخفيتش لكن الحمد لله ".

وأنهت ساهر حديثها معبرة عن أمنيتها التي تسعى لتحقيقها قائلة:" بتمني إني أشوفه أحسن راجل فى الدنيا وربنا يكرمه ويخليه ليا، وبتمني أن ربنا يعوضني فى بناتي وأشوفهم ذرية صالحة و بتمني الخير لنفسي وإني أقدر أكمل حياتي وأنا راضية ومبسوطة رغم صعوبتها ".