فاطمة عمر تكتب: نون النسوه..و..واو الجماعه.. اشرب ميه..يا استاااذ محمااااد
(نهار داخلي)
بعد أن انهت المكالمه مع زوجها او بالاصح قفل السكه في وشها لانها قلبت دماغه بالواد اللي مش عايز يروح الدرس والبت اللي بتشد شعر اختها والأسعار ونارها وطلبات البيت ومرارها ..نظرت إلى قدميها فوجدتهما حافيتين.قالت يا لهوي كده الكلام طلع من رجلي مش من قلبي زي ما قالت الأستاذه يس....مين
عاد الزوج من عمله في يوم حار فاسرعت وفرشت له مريلة المطبخ السنييه كي يخطو عليها وفي يدها كوب من الماء المثلج وقالت....اشرب يا استاااذ محماااد انت وردتنا يا اخويا ألا تدبل
فعلت كل هذا وهي تكتم أنفاسها لانه وكما قالت الميس إنه من العيب ان تتنفسي يا مدام وجوزك بيتنفس
طب وعهد الله انا لو عرضت السيناريو ده على الاستاذ اميتاب بشنان فتى الهند الاول وبطل العالم في الافلام الخارقه ستحدث ازمه دبلوماسية
هراء وسخف تتحفنا به احداهن..ميس.. يس ...مين استاذ و رئيس قسم الهري المتين
والتي دائما ما توثق كلامها الفارغ بأنها قرأته في الكتب وهنا اتذكر الفنان الرائع الراحل سمير غانم وهو يقول (انا قريت الكلام ده في مجله اسمها علمني العوم والنبي يا احمد)
استاذه يس..مين.. كارثه ان كنت تصدقين ما تقولين..مصيبه لو كنت مقتنعه انك اكفأ من تقدم نصائح للمرأه المصريه التي وبالتأكيد حضرتك تجهلين تاريخها وعظمتها وقوتها وقدرتها على إدارة حياتها دون نصائحك البلهاء
استاذه يس.. مين. ان لم تكونين ذكاءا اصطناعيا واحسبك كذلك واردت الحديث عن المرأه ولها ..عليك وانت في طريقك إلى جلسات الباديكير والمانيكير وتبييض البشره وتلوين الشعر والعينين عليك ان تتجهي إلى سور الازبكيه (وخدي بالك انه اتنقل) واسألي على عم محمد تاني بائع على ايدك اليمين واسأليه على كتاب أظنك لا تعرفين عنه شيئا الا وهو كتاب مذكرات السيده هدى شعراوي علك تتعلمين من هي المرأه المصريه
فإن لم يكن لديك وقت فعليك وكما تنصحين بوضع الخيار بجانب الطماطم وانت عارفه الباقي طبعا
او تدخلي على موقع (ما تجوزيني يا ماما قوام يا ماما)وتختاري عريس حلو كده يجعلك ترين الورد على أصوله وإياك أن تتنفسي وهو بيتنفس
لانه من الواضح أن حضرتك كنت مزوغه في محاضرة (خصائص وأهداف المحتوى المقدم في الاعلام ) اللي كانت في الدور التالت قاعه اربعه على اليمين
تشكرات
