أول رد من صاحبة موبايل مسروق بعد تريند اللص الظريف

لصوص لكن ظرفاء.. فيلم شهير للزعيم عادل إمام والفنان الكبير الراحل أحمد مظهر.. ومع اختلافات بين القصة السينمائية والواقعية، سطرت خلال الساعات القليلة الماضية واقعة سرقة موبايل فتاة وأصبحت حديث السوشيال ميديا؛ بسبب تصرف السارق الكوميدي والذي أثار ضحك وسخرية مستخدمي مواقع التواصل الاجتماعي.

بداية القصة عندما أقدم شاب على سرقة موبايل فتاة جامعية، بمحافظة الإسكندرية، والتقط عددا من الصور لنفسه، ظنا منه أن الموبايل أصبح ملكا له ولن يستطيع أحد أن يكشف سره، ولكن الرياح لا تأتي دائما بما تشتهي السفن، حيث استطاعت الفتاة وأحد أقاربها الحصول على صور للمتهم من هاتفها، وذلك من خلال أحد حساباتها على الموبايل “Google photos”.

تفاصيل الواقعة تعود لـ 4 أبريل الجاري
وروت نور ناصر، تفاصيل واقعة سرقة الموبايل الخاص بها، مشيرة إلى أن الواقعة حدثت يوم 5 أبريل الجاري، قائلة: أنا كنت راجعة من الكلية ومروحة البيت ولازم أركب من الموقف، وأنا هناك وقفت استنيت حوالي 10 دقايق عشان ألاقي حاجة اركبها، ولما ركبت لقيت سوستة الشنطة الصغيرة مفتوحة ودي كان فيها الموبايل.

وتابعت نور: معرفش وقتها الموبايل وقع مني ولا اتسرق.. بس اللي متأكدة منه إن السوستة كانت مقفولة.. المهم وقتها نزلت من المواصلات عشان ارجع أدور عليه في الموقف وكانت صاحبتي راكبة معايا، وقولتلها رني على الرقم لغاية ما حد يرد، ولما روحت الموقف ملقتش حاجة.


وأضافت: رجعت البيت وصاحبتي اتصلت على والدتي قالت لها إنه رد عليها وقالها هرجعلك الموبايل، وتعالي قابليني عند مستشفى مبرة العصافرة في الـ 21، وبالفعل صاحبتي عملت كده ولما رجعت تتواصل معاه التليفون كان اتقفل خلاص، وللأسف مكنتش تعرف أي معلومة عنه غير أنه قال إنه شغال في المستشفى ده.

واستكملت نور ناصر: وقتها حاولت أخرج من كل الاكونتات بتاعتي اللي موجودة على وسائل التواصل الاجتماعي، بس نسيت أطلع من أكونت جوجل، وبالصدفة امبارح دخلت على أكونت Google photos، وللقيت انه متصور بالموبايل، وحصلها backup على أكونت جوجل، ودا اللي ظهرها عندي.


صور اللص عبر حساب نور ناصر بجوجل
وواصلت نور: مكنتش اتوقع إن ده كله يحصل بصراحة، أنا كنت عايزة بس حد يتعرف عليه عشان أرجع الموبايل من غير محاضر والكلام ده، لأن من ضمن الصور صور لابنه تقريبا، ومكنتش عايزة أبهدله، بس الموضوع قلب كوميدي أوي والناس كلها بتضحك، وهو مكتوب إنه يكشف ويحصل كل ده.

صاحبة الموبايل ترد على تعليقات الـ سوشيال ميديا
واختتمت نور ناصر حديثها، قائلة: فلوس الموبايل دي والدي تعب فيها في شغله عشان يجيبهولي.. فـ أولًا الفلوس دي مش بالساهل، ثانيا ده عليه كل حاجاتي وصوري وحتي لو فاضي فده حاجة بتاعتي ومن مش من حق أي حد ياخدها، وبالتالي لما تضيع من حقى إنى استخدم كل الوسائل عشان أرجعها.. ودا دور السوشيال ميديا اللي مش معموله للترفيه بس.