لوسي: مش هطلب من ربنا يغفرلي.. شغلي كـ”رقاصة“ مش حاجة غلط

قالت الفنانة لوسي، إنها لا تندم لكونها راقصة، لافتة إلى أنها تقدم فنًا تعترف به مصر، وكان مرسومًا على جدران معابد القدماء المصريين، موضحة: «أنا مبعملش بجاحة أنا بعمل فن، بلدي معترفة بيا والرقص مرسوم على جدران معابد القدماء المصريين».

وأضافت "لوسي" خلال تصريحات تليفزيونية، مساء الثلاثاء: «نصيبي كده مكتوب على جبيني كده إني هبقى رقاصة وأخش معهد الباليه وأخرج من المعهد أشتغل في الأفراح الشعبية لحد ما أكبر شوية، وأكبّر ناس اللي حواليا وبعدين أشتغل كومبارس ثم ممثلة وبعدين نجمة وبعدين بطلة وبعدين مشهورة».

وأشارت إلى أنها تحب الفن بدليل التحاقها بمعهد الباليه منذ أن بلغت من العمر 9 سنوات، وعملها كراقصة في الأفراح بعمر 11 عامًا، معقبة على المنتقدين لمسيرتها: «لو كلنا قعدنا وسمعنا كلام الناس مش هنعرف نشتغل»، مؤكدة أنها لم تفعل شيئًا خاطئًا بعملها في هذا المجال، مضيفة: «لو عملت حاجة غلط أقول لربنا اغفر لي وسامحني، لكن أنا معملتش حاجة غلط، عملت حاجة العالم كله بيحبها ويقدرها إلا هنا».

وذكرت أنها عملت كراقصة؛ بسبب الظروف، موضحة أنها من اختارت وتبرعت وتركت دراستها؛ من أجل الحصول على أموال تساعدها على توفير القوت اليومي لأفراد عائلتها، موضحة: «أحب عائلتي ويحبونني، لكن كانت الظروف كده الجواز بالغصب واللي مش راضي عنه الأهالي بيعمل مشكلات واللي بيدفع ثمنها الأطفال، وربنا إداني الثمن حلو، سمعتي حلوة والناس بتحبني وأنا بحبهم وبحب الشغل والرقص والتمثيل والفن».