كلب مذيعه شهيرة يعقر جارها وحالته على شفا الموت

زوج صديقتى الغالية إيمان عبد المحسن
ووالد على و عاليا .. ولد و بنت زى القمر .. مدير ناجح في بنك عالمى
حظه انه ساكن تحته المذيعة أميرةشنب اللى بتقدم برنامج أميرة في المطبخ .. و اللى عندها كلب "بيتبول" ضخم العضلات اللى من المحظور استيرادهم دوليا دول ..

و بالرغم ان هو محب للحيوانات فعلا الا ان الكلب ده كان دايما يهاجمه فى الطالعة و النازلة و كان بيقول انه صعبان عليه جدا انه مش واخد عناية كافية فى تحسين السلوك و انه بيهاجم كل اللى بيشوفه

يوم الاحد اللي فات قرر " محب " انه يخبط على باب مدام أميرة عشان يطلب منهم يسيطروا شوية على كلبهم بدل ما هو عمال يهاجمهم كده من ورا السور القصير اللى عادى جدا انه ينط من فوقيه!!..
فتحت له الشغالة
و قبل ما يفتح بقه بكلمة واحدة خرج الكلب المفترس ده من وراها و هجم علي محب في مدخل العمارة اللى كان واقف فيه ابنه "على " و حاول انه يفدى ابنه ..
الكلب حرفياً قام بإفتراسه بدون مبالغة ..
عض في الذراع و الفخذ و أماكن متفرقه من الجسم نتج عنها قطع نافذ في الأوتار و الأعصاب !!!
و فجأه المدخل كله بقى دم !!!
طبعا ابنه واقف و شايف ده كله بيحصل لأبوه

بالعناية الإلهية فقط استطاعوا ان يفلتوه من بين أسنانه و توجهوا به لمستشفى "دار الفؤاد" بحكم انها أقرب مستشفي كبير لهم..
بعد الفحوصات أكدوا انه هيحتاج لعملية نقل أعصاب من القدم الي هذا الذراع الذي تم تمزيقه ..
بعد إجراء الفحص الطبى المطلوب دخل محمد غرفة العمليات و فور اعطاؤه حقنة التخدير توقف القلب لمدة ٣٠ دقيقة تقريباً !!
دخل فى غيبوبة و تم اعطاؤه صدمات للقلب و نقله للرعاية المركزة و تم تأجيل العملية لأجل غير مسمى حتي يعود مرة اخري للحياة
المحزن انه لم يعد للوعى حتي الآن !

مين المسؤول عن الكارثة دى ؟
المذيعة اللى مربية وحش فى بيتها و سايباه يهاجم الناس ؟ ولا المستشفى المحترم اللى حقنته بمخدر أوقف قلبه فى نفس اللحظة ؟
و كل اللى بيتقال من المستشفى مانعرفش الأسباب اللى أدت لكدة .. مانعرفش حيفوق امتى أو حيفوق اصلا ولا لا

ادعوله بالشفاء ارجوكم فالدعاء يغير الأقدار و هو الآن بين يدى الرحمن القادر