فيفي عبده: دخلت التيك توك عشان أقول إني لسة عايشة..وأنا دائما محسودة

كشفت الفنانة فيفي عبده، أمنيتها في العام الجديد 2023، إلى جانب حديثها عن العام الماضي 2022، مشُيرة إلى أنها عاشت العديد من اللحظات الصعبة بسبب وفاة شقيقتيها في نفس العام.

وقالت فيفي عبده،: سنة 2022 مُرها كان أكتر من الحلو لأن اختين ماتوا في نفس السنة وكانت مشكلة جامدة.

وأضافت فيفي عبده: كان فيه حاجة حلوة في سنة 2022، وهي إني عملت مسلسل شغل في العالي مع شيرين رضا والمخرج مرقص عادل، يعني كان فيها حاجات حلوة وحاجات مش حلوة.

أما عن أمنيتها في العام الجديد 2023، فعلقت قائلة: عاوزة ورق كويس أوي علشان أعمله مسلسل ومسرح، وعايزة تكون سنة مختلفة غير تقليدية.

وواصلت فيفي عبده حديثها قائلة: على المستوى الإنساني عايزة تبقى سنة زي الفل، وأكون مبسوطة وأطلع للناس زي ما كنت بطلع مش عارفة إيه اللي حصل لي حسدوني كل ما أخرج خروجة أرجع أنام جنبها 20 يوم، عشان كده عاوزة أعمل مسرح ومسلسل ومنصات وتسفيدوا مني ومن حماسي.

فيفي عبده
كما علقت الفنانة فيفي عبده، على شائعة وفاتها قائلة: السوشيال ميديا مدمرانا وعلى قد ما بحبها على قد ما مضايقة منها، وأنا الحمد لله محبوبة وطلعوا عليا إني ميتة وابتديت أدخل في التيك توك علشان أقول لكم أني صاحية، لأنهم كانوا سارقين صفحتي وقرفوني.

واستكملت حديثها قائلة: الانستجرام ده أساسي بالنسبة لي لأن مفيش أي لفظ أو تعليق عليه مش حلو، ودلوقتي مش بيهمني التعليقات الوحشة، لكني مش بحب الفيس بوك طلعت متعقدة منه ومن الميديا ومن الكذب والافترا والاكتئاب، ولحد دلوقتي ما طلعتش على تويتر.