أنا متابعة هدير عاطف وبحبها واستوريهات زوجها ورطتني.. ننشر التحقيقات في قضية البلوجر الشهيرة وطليقها

كشفت التحقيقات تفاصيل جديدة في واقعة اتهام البلوجر هدير عاطف وطليقها بلال محمود وشقيقته وزوج شقيقته بالنصب على المواطنين، أن المتهمين استغلوا عدد متابعيهم على مواقع التواصل الاجتماعي واستولوا منهم على مبالغ مالية لاستثمارها مقابل أرباح شهرية.

ننشر التحقيقات في قضية البلوجر الشهيرة وطليقها
ونستعرض نص التحقيقات في القضية التي حملت 11080 لسنة 2022 أموال عامة التجمع الخامس، حيث استغلت المتهمة هدير عاطف عدد المتابعين لها على موقع التواصل الاجتماعي فيسبوك، وأعلنت على طريق العلانية، أن طليقها يقوم بمشروع استثماري لمن يريد أن يستثمر أمواله بهدف جمع الأموال.


وتابعت التحقيقات في قضية هدير عاطف وطليقها أن شقيقة المتهم بلال محمود جمعت الأموال من المواطنين بهدف استثمارها مع شقيقها في تجارة العقارات والسيارات على خلاف الحقيقة، وتجارته غير المشروعة في تداول العملات الرقمية البيتكوين.

واستمعت جهات التحقيق بالتجمع الخامس، إلى أقوال المجني عليهم في اتهام بلال محمود طليق البلوجر هدير عاطف، وشقيقته وزوجها بالاستيلاء على أموالهم.

س: ما تفصيل بلاغك؟
ج: أنا كنت بتابع البلوجر هدير عاطف وبحبها جدا، بدأت أشوف استوريهاتها لجوزها بلال، بدأت أتابعه وأشوف شغله وهو بدأ ينزل عروض وأرقام تواصل لسيلز وناس شغالة معاه، بدأت اتصل وأفهم منهم التفاصيل وأي العروض المتاحة، وفي عرض منهم كان مناسب فلوسي، اتفقت مع أخته إني عايزة أعمل عقد بمبلغ 25 ألف قالتلي حولي الفلوس فودافون كاش وبعدها علي طول هبعتلك صوره العقد واتس، موافقتش قولتلها أي الضامن ليا، قولتلها عايزة اتقابل معاكم وأعمل عقد وأنا قاعدة، قالتلي ماشي بس المقابلات مرفوضة دلوقتى عشان أستاذ بلال بيفتح شركة في المهندسين ومش فاضي لو كده أنا هظبط وأقابلك أنا ويوسف، قولتلها مفيش مشكله قالتلي نتقابل بكرة قولتلها ماشي، قالت تيجي التجمع كل العقود بتتعمل هناك قولتلها ماشي، بعتتلي لوكيشن المكان اللي هروحه، هو كافيه وروحت أتاخرت عليا جدا، وبعد كده جات هي وجوزها وبنتها وواحد تاني معاهم شغال بس مش فاكرة اسمه قريت العقد لقيته قانوني ولو طلع كذب هعرف آخد حقي وبعد كده قولتلها اكتبي العقد وخلاص كتبنا العقد وخدت الفلوس.


واستطردت المجني عليها أمام جهات التحقيق في قضية البلوجر هدير عاطف وطليقها قائلا: المفروض آخد أول ربح ليا بعد شهر، في يوم معين اتصل محدش بيرد وشوية مقفول وشوية يوسف جوزها رد قالي أستاذ بلال بقي شغال لوحده تابعيه وخدي منه إحنا ملناش دعوة إحنا سيبنا الشغل، قولتله أنا مليش دعوة أخته هي اللي عاملة العقد معايا قفل السكة وبعد كده مقفول وشويه بلال بدأ ينزل استوريهات إن أقرب الناس ليه نصبت عليه وطمعانين فيه، وبدأ يعمل أسك والناس تكتبله إنه عايزين يكملوا وهو يرد يقول أنا دلوقتي مدي فلوس لناس توصلها للي عايز يلغي العقد، وأنا كنت ببعتله إني عايزه أكمل بس عايزة ربحي وبعد كده استوريهات خطف مراته وبنته وبعدين إنه مات وبعد كده عرفت إنه اتحبس هو ده كل اللى حصل.

س: أين حدث ذلك تفصيلا؟
ج: أنا الأول كلمتها على رقمها وبعتلها على الواتساب، واتفقنا نتقابل في كافيه بالتجمع الخامس اسمه زا مارت بالتجمع الخامس، وأنا كنت مستنياها في الكافية واخرت عليا وبعدين جات هي وجوزها وكان معاها عقد ومكنتش عايزة تمضي العقد وأنا قولتلها لازم تمضي في الآخر مضيت وأخدت مني 25 ألف جنيه وكمان خلتني دفعت 2000 جنيه قالتلي للمحامي.

س: ما هو الضرر الواقع عليكي إذن؟
ج: أنا اتنصب عليا وعايزة فلوسي.

س: ومن القائم على ذلك؟
ج: هدير عاطف فاشون بلوجر ومقيمة دائرة قسم المعصرة، وهاجر محمود بدون عمل، وبلال محمود، وتامر عادل.

س: من أين تعرفتي على المتهمين؟
ج: أنا عرفت طبيعة شغل بلال عن طريق هدير وإنه بيشتغل في البورصة وهي كانت بتعمله منشن كتير على وإنستجرام.

س: من كان برفقتك أثناء توقيع العقود؟
ج: أنا كنت لوحدي.


وكان قاضي المعارضات بالتجمع الخامس، في وقت سابق قرر تجديد حبس المتهمين البلوجر هدير عاطف، وطليقها بلال محمود، وهاجر محمود، وتامر عادل، 15 يومًا على ذمة التحقيقات عن طريق الفيديو كونفرانس، من قسم شرطة التجمع الخامس لاتهامهم بالنصب.