كفاية بقى إحنا قرفنا.. مرتضى منصور يفتح النار على عمرو أديب

فتح المستشار مرتضى منصور، رئيس نادي الزمالك، النار على الإعلامي عمرو أديب، موجهًا له رسالة نارية بعد تجاهل الأخير تهنئة مجلس الإدارة بالفوز بكأس مصر.

وقال "منصور" خلال تصريحات تليفزيونية: "عمرو أديب طلع إمبارح شكر البلاط والنجيلة والعارضة وعامل غرفة الملابس ومخلاش حد مشكرهوش، ماعدا مجلس الإدارة المحترم ورئيسه، مع إنه لما كان الزمالك بيحصل فيه أي إخفاق كان بيطلع يترقص، ويقول: الزمالك خرب وإني خربت النادي، وأنا بقول له: لم نفسك".

وتابع رئيس نادي الزمالك: "عمرو أديب بيقول إنه زملكاوي وأنا بقول له لو إنت زملكاوي عندك 5 أو 8 مليارات جنيه ابعت لي منهم مليارًا أو 100 ألف جنيه أشتري لعيبة، كفاية بقى إحنا قرفنا، وإنت عمرك ما كنت زملكاوي، ولكن بتركب الموجة، لما الزمالك بيكسب وياخد بطولة وتطلع تترقص، ده انت شكرت الناس كلها، وتجاهلت مجلس الإدارة وأمير مرتضى المشرف على الكرة".

وأكمل: "الغل واكل قلبك يا عمرو أديب، وبحذرك للمرة الأخيرة إنت وصاحب القناة اللي شغال فيها ملكش دعوة بالزمالك، والزمالك لما تيجي تتكلم له رئيس محترم اسمه المستشار مرتضى منصور ومجلس إدارة محترم ومشرف على الكرة".

واختتم: "إنت مالك بالزمالك يا عمرو أديب؟!، ناسي لما كنت إنت وأحمد موسى وشوبير لما سألتوا وزير الرياضة عن عدد المخالفات اللي عليَّا، ولما رجعنا كسبنا الانتخابات باكتساح، أنا الرئيس التاريخي للزمالك غصب عنك".