دعاء عبد السلام تكتب: عارفين نيرة اتقتلت امتى؟
• يوم ما عبد الله رشدى حرض المتطرفين من اتباعه على البنات بسبب لبسهم وانه بيثير غريزة الرجال واتهمهم بالسفور.
• يوم ما عبد الله رشدى حرض على الزوجه اللى مش قادرة تعاشر زوجها جنسياً لأى سبب.
• يوم ما صرح فضيلتة بإباحة ضرب المرأة.
• يوم ما الشيخ على جمعة مفتى الجمهورية قال يحق للرجل النظر للمرأة المتبرجة لانها لا ترتدى الحجاب.
• يوم ما اسامه القوصى أباح للرجل النظر للمرأة أثناء استحمامها ما دام ينوى زواجها.
• يوم ما ياسر برهامى السلفى ما صرح بعدم دفاع الرجل عن زوجته فى حالة عرضها للاغتصاب اذا خاف على نفسه من الموت.
• يوم ما مصطفى العدوى السلفى ما صرح بعدم جواز لبس المرأة للكعب العالى خارج البيت لان ده تبرج ويثير الرجال.
• يوم ما صبرى عبد الرؤوف استاذ الفقه المقارن بالازهر ما صرح بمضاجعة الوداع واباح نكاح الزوجه المتوفاة.
• يوم ما الدكتور عزت عطية رئيس قسم اصول الدين ما صرح بانه حق للمرأة العاملة ارضاع زميلها فى العمل منعا للخلوة المحرمة.
• يوم ما فرقوا بين د.نصر ابو زيد وزوجته لانه فكر بعقله ورفض الافتراء على الله والرسول.
• يوم ما مراقبة اللجنة فى جامعة طنطا تنمرت بفتاة وقالت لها انتى نسيتى تلبسي بنطلونك.
• يوم ما صيدلي بالمنوفية صفع بنت مسيحية بالقلم لان شعرها مكشوف واتعمل قاعدة عرفية ومحدش حاسبه.
• يوم ما العريس ضرب عروسته يوم الزفاف فى الشارع ومحدش دافع عنها.
• يوم ما ممرضة السلام انتحرت من البلكونه بعد ما صاحب العمارة شهر بيها علشان رفضت تجارية فى السفالة فسوء سمعتها وحرض المنطقة عليها.
ويوم ويوم ويوم ويوم ..... أحزان واجعة القلب ومخوفانى على البلد ومستقبلها.
البلد محتاجه قبضة أمنية حديدية مع كل متطرف والاهتمام بالتعليم والثقافة بدء من سن ٤ سنوات لان الجيل الحالى غالبيته تلوث بأفكار التطرف وشفنا ده فى التعليقات على مقتل نيرة.
ربنا يرحمك أيتها الملاك الطاهر وترقد روحك فى سلام تنعم بالجنة بعيدا عن انجاس الأرض