«مفيش عازبات».. فندق يرفض إقامة فتاة ”سينجل“ بداخله وصديقتها تستغيث
تداول رواد السوشيال ميديا منشورًا على موقع التواصل الاجتماعى"فيس بوك" لفتاة تُدعى مروة الشربينى تتهم فيه أحد فنادق مرسى مطروح الشهيرة بمنع زميلتها من حجز غرفة بمفردها بداخله، مما أثار غضب رواد السوشيال ميديا، وجاء محتوى المنشور كالتالى.
قالت مروة: "أول مرة من بداية شغلى اتعرض للموقف ده، احنا طول الوقت بسبب طبيعة شغلنا بنسافر كتير وفى بعض الأحيان بنحجز فى فنادق والشركات اللى اشتغلت فيها بتبعت ايميل رسمى بالحجز ومفيش أى مشاكل واجهتنا، فندق ريو مرسى مطروح RIO HOTEL Matrouh لما تواصلت معاهم عشان احجز غرفة سينجل لزميلة معايا فى التيم ولازم مبيت رد عليا فى الأول شخص وقالى تمام وبعدين فجأة سمعت صوت شخص تانى أخد منه الموبايل حسب تعريفه لنفسه إنه مدير الإستقبال والمسؤول عن إدارة الفندق انه ممنوع نزول البنات السينجل ولما رديت عليه إننا شركة أدوية وإن دى مش هتبقى أول مرة وهيتكرر الإقامة فى الفندق بعد كده كتير وهيتبعت ايميل رسمى بالحجز رفض وكان بيرد بمنتهى العنجهية والبرود وقلة الذوق".
وأضافت خلال منشورها: "ولما قلتله إن مفيش قانون بينص على رفض الحجز لبنات سينجل ولو فيه بند ينص على كده أو تعليمات يتفضل يبعتهالى كان الرد إنه بردوا ممنوع ودى تعليمات صاحب الفندق، الموقف ده فيه مخالفة صريحة للدستور المصرى فى مواده 11 و53 اللى بتنص على المساواة وعدم التمييز والمادة 62 التى تكفل حرية التنقل والإقامة والمواد 161 و176 و309 من قانون العقوبات والتى تنص على عقوبات بشأن أى عمل أو الامتناع عن عمل من شأنه التمييز بين الأفراد أو الإساءة لهم أو الحط من شأنهم وعلى أساس المواد دى رئيس غرفة المنشآت السياحية وكمان وزارتى الداخلية والسياحة سايبين الفندق ده ليه يمارس بلطجته والعفانة الوهابية فى قطاع مهم وحيوى زى السياحة وعاوزة اعرف الحاج صاحب الفندق فاتحه ليه؟!، ما يشوف له خيمة أحسن ويجيب له معزتين ولا بقرتين يسرح بيهم".
