حسبي الله ونعم الوكيل.. حمو بيكا بين الحياة والموت.. شاهد
نشرت الصفحة الرسمية لمؤدي المهرجانات حمو بيكا عبر موقع التواصل الاجتماعي "فيس بوك"، صورة له خلال تواجده في المستشفي، وعلقت قائلة: "ادعو لحمو بيكا يقوم بالسلامة يا جدعان .. وحسبي الله ونعم الوكيل في اللي كان السبب".
وكان حمو بيكا قد هاجم نقابة الموسيقيين خلال تصريحات تليفزيونية، حيث تحدث عن أزمته مع نقابة المهن الموسيقية والظلم الذي يتعرض له، مشيرًا إلى أنه يدفع مبلغًا للنقابة لا يساوي المبلغ الذي يأخذه في الإيصال.
وقال "بيكا": "أنا بدفع 15 ألف جنيه لنقابة المهن الموسيقية وباخد 2000 جنيه بس في الإيصال اللي بستلمه، ورفعت قضية على النقابة كلها وقضية كبيرة ولازم أوصل صوتي للناس اني مظلوم"، وواصل: "المرة الجاية هقول كل أسامي الناس اللي ظلمتني ولسة بتظلمني، حرام عليكو أنا تعبت وهموت وهتجنن، وصرخت للي خالقني هو وكيلي ويكشف الظلم والفساد".
وأضاف: "والمصحف ما باخد جنيه، وبطلع أوردرات ببلاش من النقابة، ومش بتكلم عشان عايز آكل عيش ولو اعترضت هيقولوا متشتغلش خلاص، وأشتكي لمين؟ أنا معنديش حد أشتكي له غير ربنا.. ومقدرش أقول أنا دا أجري مقدرش أعمل كدا".
وتابع: "أنا مش مبسوط إني أغني برا بلدي، ومش بإيدي والناس اللي منعوني، ميعرفوش إن فيه ربنا وقانون يجيب لنا حقنا، أنا لو بإيدي أشتغل في بلدي وتراب مصر يكفيني"، موضحًا: "النقيب بيقول المهرجانات متنفعش تكون في مصر، طب اشمعنا باقي المطربين أخدوا كارنيهات، وفيه مطرب مشهور، مش هقول اسمه مزور ورق مش سليم، وكان متصور فيديو بالصوت والصورة على مواقع التواصل الاجتماعي، ومع ذلك أخد الكارنيه".
وأضاف: "أنا ورقي كامل ومفيش ولا ورقة ناقصة، وأنا مش صوت ولا كروان بس ليا جمهور وشعبية كبيرة والناس بتحبني، وأنا نفسي أتصنف بس راب ولا أي حاجة، والامتحانات في النقابة ماشية بما لا يرضي الله، وجابولي ناس كبيرة من الأوبرا يختبروني، وكان لازم أغني لأم كلثوم وعبدالحليم حافظ، في المقابل زمايلي غنوا مهرجانات في الاختبارات.
وأوضح "بيكا"، أنه يشعر بظلم شديد ويتمنى أن ينجح في اختبارات نقابة المهن الموسيقية، ويحصل على الكارنيه ويعود للغناء على مسارح مصر مرة أخرى.
