خبير يحذر.. يمكن تكرار واقعة بسنت خالد مع كل البنات بصور وفيديوهات.. تفاصيل

رصد "أنا حوا" تداول رواد مواقع التواصل الاجتماعي منشورًا على نطاق واسع للتحذير من الوقوع فريسة للغرائز الشيطانية الدنيئة على غرار فتاة الغربية بسنت خالد التى تم فبركة صور إباحية لها من أجل المثول لرغبات المبتز إلا أنها فضلت انهاء حياتها عن التفريط فى شرفها، وجاء نص المنشور كالأتى.

"أنا لأول مرة هتكلم بالعامية هنا، بس عشان الموضوع عاوزُه يوصل للجميع، مُعظم اللي هنا عارفين إني مُهندس برمجيات، فاللي هقوله دا مش من وحي خيالي، لأني قرأت عن الموضوع اللي هتكلم فيه، لكن بالله عليك اقرأ للأخر عشان الموضوع مُهم"

وأضاف: "طبعًا مُعظمنا سَمع عن بسنت خالد واللي حصل لها، بس أنا عرفت الموضوع بشكل سطحي، وفي نفس الوقت قُلت في نفسي يعني فيه حد لسه بيصدق مواضيع الفوتوشوب دي؟! إزاي أهلها يصدقوا دا عليها؟! والموضوع مَرَّ عليّ ولم أُركز فيه بشكل كاف، ومن وقت قُصير قرأت عن حاجة كدا، والحاجة دي قَلبت تفكيري 180 درجة، واللي خلّاني أعرف ليه صُور لبسنت انتشرت كدا والناس صدقوها وإبتلعوا الطُعم، ودا موضوع الرسالة دي".

وأوضح المنشور، "فيه خدمة إسمها Deep Fake .. الخدمة دي hidden يعني مُختفية، بتقدم إيه؟! Deep fake porn as a service (أه زي ما أنت قرأت، يعني بتقدم أفلام إباحية مُفبركة)، إزاي بقى؟!، الخدمة دي بفلوس، ويعمل لك ڤيديو حوالي 300 ثانية = 5 دقائق، بحوالي 0.0007 bitcoin، والـ bitcoin دي عُملة على الإنترنت، وتساوي حوالي 30 دولار، كُل اللي عليك إنك تدفع الـ 30 دولار، وتبعت صُورة للشخص اللي عاوز تعمل له ڤيديو إباحي لدرجة إنه هو شخصيًا يصدّق إنه هو اللي في الڤيديو".

واستكمل، "طيب إزاي دا بيحصل؟!، أولًا لها شروط، يعني لا يكون الشخص لابس نظارة، ومش لابس حاجة علي رأسه، ويكون باصص للكاميرا بشكل مُباشر وعينيه تكون مُوجَّهة للكاميرا بشكل مُستقيم، يعني لا ينظر ليمين ولا شمال، وحاجات تانية عشان الكُل يصدق، زي الصورة تكون full 720hd وهكذا، ومش شرط علي فكرة 5 دقائق للڤيديو، بل في عروض تانية علي حسب الوقت اللي إنت عاوزُه عادي جدًا، ومش كدا بس.. لا.. فيه خاصية كمان إنك تجيب فيلم إباحي كامل وتركب صورة الشخص عليه بشكل محدش يصدّق إن الڤيديو دا تركيب".

وأردف "فيه حد قرأت له بوست وقال إنه مصدّقش دا وإفتكرها إشتغاله زي ما بيحصل في الـ dark net وغيره، فحاول يُبص على الـ feedbacks (آراء الناس عنها) اللي مكتوبة، ولقاها كُلها حلوة والناس بتشكر فيها، فإفتكرها إنها مُزيفة برضو عشان صاحب الخدمة دي يروّج لحاجته، فالمُهم الرجل دا دخل كلّم حد من الناس اللي شكّرت في الخدمة وسأله عن الخدمة، الرجل بقىٰ أرسل له صُورة شخص، وأرسل له مقطع الڤيديو الإباحي الأصلي، وأرسل له الڤيديو بعد التركيب، أنت مُتخيل إنه بصورة واحدة بشروط زي اللي قُلتها فوق مُمكن الخدمة تعمل توليد لباقي الصور؟! يعني بأوضاع مُختلفة، زي مثلًا لما تبص يمين وشمال وتحرك عينيك وهكذا، لأن الخدمة دي قائمة على الـ AI .. يعني الـ Artificial Intellegence .. وهو الذكاء الإصطناعي".

وتابع "المُهم الرجل إتصدم لما شاف المناظر دي ومش مصدّق اللي شافه وقفل علي طول، هو إعتقد إن أي مُنظمة دولية هتقفل الخدمة دي لأنها هتضر الكبير والصغير، فأكتشف للأسف إن فيه hidden لخدمات تانية بتعمل علي تطوير مُحرك الذكاء الإصطناعي اللي بتعمل عليه الخدمة دي، بمعني إنها لو في مرة إختفت، هتظهر غيرها 1000 واحدة بشكل تلقائي، وخصوصًا إن الخدمة دي مش علي النت العادي اللي الناس بتستخدمه، أنا ليه قُلت دا كُله؟!، لما كُنا زمان بنحذر البنات من إنهم يحطوا صُورهن في النت، كانت البنت بتضايق وتفتكر إننا بنكبت حُريتها و و و.. إلخ، وأنا حاليًا في مجال البرمجيات، وأقول المجال دا لو حد إستخدمه بصورة سيئة، فـ والله هو قادر يخلي كُل واحد يقعد في بيته وميشوفش نُور الشمس من خجله من الناس".

وأكمل "الموضوع دا مبقاش للبنات بس، لا دا بقىٰ للرجال كمان والموضوع لو محدش هيقدر يوقفه، فـ واللهِ العالَم الفترة الجاية مش هيكون بخير، تخيل حضرتك لما تكون بنت قاعدة في بيتها مُعزَّزة مُكرَّمة، وتلاقي شباب منطقتها بيتداولوا ڤيديو إباحي لها، وإبقىٰ قابلني لو حد أثبت إن الڤيديو تركيب، وحتىٰ لو حد أثبت دا محدش هيصدق إن التكنولوجيا إتطورت لدرجة السفالة والإنحطاط دا، الذكاء الإصطناعي مش صناعة إنسان آلي وبس، الموضوع أكبر من كدا بـ كتير".

واختتم "أه بالمُناسبة؛ البنت المُنتقبة اللي فاكرة وشها مش متشاف فـ هي كدا في أمان، أُقسم بالذي رفعَ السماء صُور المُنتقبات حاليًا بقت في حسابات إباحية وبيتغزلوا فيهن ومش عاوز توضيح أكتر من كدا، وحتىٰ مش بعيد يعني إن الخدمة دي تأخد صورة بنت مُنتقبة وتركّبها علي ڤيديو إباحي برضو إيه المانع؟!، الخدمة دي تستهدف البنات أكتر من الرجال، الخدمة دي معمولة عليهن أصلًا، فـ حضرتك كونك تجادلي في إنك حاطة صُورة لك، متعرفيش إن الصورة دي تكون كنز لحد عاوز أذية لك، مثلًا شاب مع حضرتك في الجامعة أو الدرس عاوز تكونوا أصحاب (ودا حرام قطعًا)، فـ حضرتك ترفضي دا، فيستغل دا ضدّك لحد ما تروحي له ذليلة ويعمل اللي عاوزه عشان لا تتفضحي، والقصص كتير، والحكايات في كُل قصة أكتر".