ودعنا وقالى حاسس إنى هموت.. زوجة الفنان أحمد هيبة تكشف تفاصيل مصرعه فى حادث

قالت زوجة الفنان الراحل أحمد هيبة: "مكنتش اعرف أن زوجى توفى إلا بعدها بفترة لما الناس شيرت صورة بطاقته على النت، واتصلت بيا واحدة قريبتى قالتلى مش ده جوزك، ولما بصيت في البطاقة قولتلها اه هو، قالتلى ده عمل حادثة وفى المستشفى دلوقتى.. مقالتش إنه مات ولما وصلت المستشفى الدكتور قالى البقاء لله في جوزك وشدى حيلك".

وأضافت: "قالولى تعالى اتعرفى على شكله، ودخلت المشرحة كانوا بيشيلوا الدم من على وشه علشان اشوفه وكانت الجمجمة مهشمة، شوفت المنظر انهرت وانفجرت في البكاء جوزى سابلى 4 أبناء ومات قبل ما يشوف بنته الرابعة أو تشوفه، أنا دلوقتى حياتى وحياة أولادى أدمرت وعايزة حق جوزى من السواق اللى عمل الحادثة وشرد أولادى وهرب".

واستكملت: "جوزى كان طيب مع كل الناس وكان نازل الساعة واحدة بالليل علشان جاله عقد عمل في فيلم جديد بعد فترة طويلة كان قاعد فيها من غير شغل، ولما نزل قالى أنا مش هشوف بنتى اللى هتتولد حاسس إنى هموت، قولتله متقولش كده بس هو كان صادق وودعنا قبل ما يمشى وراح ومرجعش، مضى عقد الفيلم وكلمنى وهو راجع قالى أجيب أكل أيه للأولاد وأنا جاى وبعدها لما لاقيته اتاخر اتصلت بيه طول الليل لحد الصبح محدش رد".

وأردفت: "كل حاجة كانت معاه راحت في الحادثة حتى فلوس العقد اللى مضاه كمان ضاعت في الحادثة والبيت دلوقتى من غير فلوس، أنا كل اللى طلباه أن حق جوزى يرجع من السواق وحسبى الله ونعم الوكيل ربنا مش هيسيب حق ولادى، كان طيب مع كل الناس وعمرى ما زعلنى ولا زعل عيال وكنا عيشين في حالنا ومحدش يسمع عننا حاجة".

يذكر أن الممثل أحمد هيبة شارك فى العديد من الأعمال الفنية بأدوار ثانوية منها: "مافيا، غش الزوجية، المركب أبو شنب، حملة فريزر، اللعبة الأمريكانى، تيتة رهيبة، المركب، عمارة يعقوبيان، الشبح" وغيرها".