الأمن يفحص منشور تحرش مسن بفتاة داخل أتوبيس مسطرد
في رد فعل سريع وتحرك عاجل، تفحص أجهزة الأمن بوزارة الداخلية منشور فتاة يتهم مسنا بالتحرش بها والتعدي عليها بالضرب داخل أتوبيس أثناء توجهها من منطقة مسطرد بالقليوبية إلى العتبة بالقاهرة.
وأكد مصدر أمني أنه سيتم فحص المنشور للتأكد من صحته واتخاذ الإجراءات القانونية اللازمة حياله.
وزعمت إحدى الفتيات، تدعى “ليزا نسيم”، تحرش مسن بها أثناء ركوبها إحدى المواصلات من مسطرد إلى العتبة.
المنشور
تحرش مسن
وقالت الفتاة عبر منشور فيسبوك: "كنت راكبة أوتوبيس من مسطرد للعتبة إمبارح وكان الكرسي اللي جنبي فاضي وركب جنبي راجل كبير في السن شكله مريب لابس نظارة سودا، اتفاجأت بيه بيلمس جسمي".
وأكملت الفتاة: “بعدت وقلت مش واخد باله فلقيت إنه بيكرّر الحركة، وبدأ اللمس يتحول لتحرش صريح، وأنا بجدّ مصدومة مش عارفة أعمل إيه، وفضلت أزعق وأعلّي صوتي، وهو يزعقلي ويقولي اسكتي، واتصدمت أكتر إن الناس سمعتني بزعق ومحدش اتكلم”.
عاوزة حقي
وأضافت ليزا: “بدأت أطلب منه يخليني أعدّي وأقوم أنقل مكاني مرضيش يعديني، وبدأت الناس تقوله حضرتك قوم وانقل مكانك راح قال لا مش هقوم، وفضلت أزعق جامد عشان يرضي يعديني أو يقوم”.
وتابعت: “اتفاجأت بالشخص بيجيبني من شعري وبيضربني، وكأنه مستحملش إني أفضحه، وأنا بصرخ وبعيط وراح كام واحد قاموا يبعدوه عني، وساعتها حاولت أكتم عياطي وأطلع الموبايل أصور أي حاجة علشان أجيب حقي”.
وأنهت حديثها: “أنا عاوزة حقي وحق كل بنت بجد بتتحط في الموقف دا بتسكت علشان إحنا مش مباحين، وأنا هكبّر الموضوع ومش هسكت غير لما ياخد عقابه وأخد حقي منه”.
