مؤسس ”أمهات مصر“ تتابع طلاب المرحلة الإبتدائية.. وأولياء أمورهم يعلقون
واصلت عبير أحمد، مؤسس اتحاد أمهات مصر للنهوض بالتعليم، وإئتلاف أولياء الأمور، متابعة طلاب المرحلة التعليمية المختلفة، حيث رصدت وتابعت طلاب المرحلة الابتدائية خاصة فيما يتعلق بالمناهج والمذاكرة.
وتلقت عبير عشرات التعليقات من جانب أولياء أمور طلاب المرحلة الابتدائية على صفحة الاتحاد والائتلاف، في الفيسبوك، حيث قالت ولي أمر: "العلوم.. سنة سادسة صعب جدا، ومنهج شهر أكتوبر الكم كبير اوي اوي وعلي الوقت ملحقناش نبدا ناخد الكم دا ومش عارفين هندخل ازاي نمتحن واحنا اصلا لسه مستلمتش الكتب المدرسية".
وأضافت ولي أمر أخري: "المناهج صعبه وتقيله علي الإستيعاب خاصة الانجلش، وكتاب العربي رابعه ابتدائي لسه مأخدهوش"، وتابعت أخرى: "منهج رابعة طويل جدا وضغط كبير على الولاد ولحد دلوقتى مفيش كتب وزارة والمفروض فى امتحان كمان أسبوع".
وذكرت ولي أمر: "مواضيع القراءة فى العربى كتير جدا ومطلوب من الأولاد حفظ كمية المعانى والمضاد ومحدش بيقولى فهم مفيش طالب لحد سنة خمسة يقدر يجيب المعنى والمضاد من خلال الفهم".
واستكملت ولي أمر: "بنتي سنه رابعه تجريبي، المواد كتيره قوي مافيش أي لازمة لمادة المهارات وال ict مجرد ضغط علي الطالب وخصوصا إن الوزارة مطبعتش كتب ليهم، وطبعا احنا تحت رحمة المدرسين وليه هما في المجموع ايه فايدتهم، والمناهج كتير وكلمات فعلا صعبه في الساينس وكونيكت بلس ده غير آن منهج أكتوبر كتير بزيادة بجد، بنتي مضغوطة مذاكرة ودروس ولا كأنها في ثانويه عامه وهي لسه صغيره قوي علي كده".
