د. فتحي الشرقاوي يكتب.. حذار من الارتباط بالشخصية (المسطحة)
الشخصية (المسطحة)
تخيلوا معايا حضراتكم إن الشخصية دي ترتبط زواجيًا بشخصية تأملية رومانسية حالمه، أو بشخصية ذات نمط تفكير متعمق (عميقه) ساعتها ممكن نقول الله يرحم العلاقة بينهما قبل أن تبدأ.
ما هى سمات هذه الشخصية المسطحة؟، علشان لما تختاروا شركاء حياتكم واللي هيكملوا معاكم رحلة اعماركم يبقى تختاروا صح.
أولًا
مابيحبش تدخل معاه في موضوعات فيها عمق، فكل موضوعاته تتسم بالتفاهه والسذاجه وكأنك تتكلم مع شخص منعدم الصلة بالواقع لا معلومات ولا بيانات ولا أحداث، فقر معلوماتي رهيب، من الصعب اقامة حوار مُشْبع معه من كتر تفاهته.
ثانيًا
سريع الانفعال لأتفه الأسباب سواء بالحب أو الكراهية، لما بيحب حاجه بيحبها بشده وتطرف وكذلك لما بيكرهه علشان كده بيهول ويهون من افكارك أثناء الكلام معاك، ياريت ماتسايروش في انفعالاته وتصدقها وتبقى مخضوض.
ثالثًا
لا يعرف معنى التعاطف أو تقديم المساعدة للآخرين، لا تنتظر منه يقدملك مساعدة أو يتعاطف معاك، إلا لو أثرت انفعالاته ودائعه للتعاطف معاك وفي الوقت ده، ممكن يساعدك وبعدها مايعرفكش (حل موقفي).
رابعًا
ليست لديه قدرة للاستبصار والتدبر فيما يفعل وده بيخلي كل مشروعاته وأهدافه فاشله ومابتكملش.
خامسًا
يتخذ قراراته بعشوائية تحت ضغط الهروب من السلبيات، ليس بغرض مواجهتها ومعرفة اسبابها ومعالجتها، علشان كده لا يعُتمد عليه في اتخاذ القرارات الاسرية لأنها قراراته كلها رعونه وتسرع.
سادسًا
محتاج دائمًا اشباعات فورية وسريعة، مابيعرفش يعمل إرجاء (الصبر) على رغباته وحاجاته، لو فكر في حاجه أو أراد الحصول على شيء يبقى عاوزها دلوقتي، دون اي إرجاء او انتظار.
سابعًا
عياني التفكير.. مابيعرفش يسرح بخياله ولا بيعرف يتأمل، ولا بيعرف يتوقع ولا يتكهن بنتائج افعاله قبل مايعملها (أهلهلي)، يعني لا يميل لرؤية رواية أو قراءة قصة أو التأمل في لوحه او صورة كل دماغه وتفكيره في الحاجات الملموسة المحسوسة العيانية بس.
ثامنًا
لا يستطيع إدارة أو قيادة أي جماعة حتى لو كانت اسرته الصغيرة، لأنه ما بيعرفش يحسم او يربط، أمور حياته كلها سايبه.
تاسعًا
احساسه بالمسؤلية الفردية والجماعية تكاد تكون شبه منعدمة.
