د. فتحي الشرقاوي يكتب :زوجات لا يطيقهن أزواجهن
د. فتحي الشرقاوي أستاذ العلاج النفسي جامعة عين شمس يكتب:
- واحدة طول ماهي قاعدة في بيتها لا بتهتم لا بلبسها ولا بشكلها ولا بزينتها ولا شكلها ،هدومها اللي بتطبخ بيها هى اللي بتنام بيها ويمكن كمان بتقابل الضيوف بيها..آخر مرة حطت شوية كالونيا وشويةاحمركان يوم جوازها.
- واحدة طول الليل والنهار قاعده في بيت ابوها وامها واخواتها وكل كلامها عنهم بس لو قعدت في بيتها شويه يبقى يوم عيد على الراجل جوزها...( ماإتفطمش نفسيا عن أمها).
- واحدة على طول متمرده وناقده لجميع تصرفات وسلوكيات جوزها مابتشفش منه ولا فيه إلا كل نقيصه وعلى طول بتطلعه غلطان ومافيهوش حاجه واحدة بس تعجبها ، ودايما محسساه..إنها هي بس اللي بتفكر وبتفهم وبتتصرف أحسن منه.
- واحده على طول مكبلاه بالطلبات اللي أكبر من امكاناته وقدراته مابتعذروش ولا بتقدر ظروفه وعلى طول مشيلاه الهم والغم والنكد.
- واحدة على طول بتراقب جوزها وحاطاه تحت المراقبة بتفتش ملابسه وحاجاته وكل كلامها معاه روحت فين وجيت منين وكلمت مين.
- واحدة كل أمور وأخبار جوزها مطلعاها بره لأهلها وصاحباتها، دَبة النملة في بيتها..تلاقيها منشورة عند كل الناس.
- واحدة مايحللهاش نقد ولوم جوزها..إلا قدام الناس ودايما مطلعاه قاصر ومابيعرفش يتصرف.
- واحدة لا تعترف إن جوزها له عالمه الشخصي ومن حقة إنه يمارس جزء من حياته مع زملائه وأصدقائه وتعتبر جوزها جزء من ممتلكاتها وبالتالي من حقها التصرف فيه كيفما شاءت.
هذه بعض النماذج والبقية تأتي.
