الفنانة هالة أنور تكشف تفاصيل رحلة عودتها من الموت ولماذا ارتدت الحجاب؟
كشفت الفنانة هالة أنور، تفاصيل العملية الجراحية الخطيرة التي خضعت لها منذ أكثر من عامين، لافتة: "كانت عملية نسائية بسيطة جدًا بعيدة عن تكميم المعدة، ولكن المضاعفات والمشكلة التي تعرضت لها كانت أثناء تقفيل الجرح"، موضحة: "أثناء العملية وهما بيخيطوا الجرح عملولي انسداد وشلل في الأمعاء وخرم القولون".
وقالت "أنور" خلال تصريحات تليفزيونية: "قعدت شهرين ونصف بين الحياة والموت بسبب خطأ طبي، وكنت مصدومة بسبب التعتيم عن الخطأ اللى حصل في العملية، ليه لما يكون فيه خطأ يبقى فيه سكوت لإن لما يكون فيه سكوت التمادي في الأخطاء هيتكرر".
ولفتت: "أنا مشوفتش الدكتور بتاع العملية الأولى إلا في العملية ومتصور معايا كمان لإني واخدة بنج إنما ربنا بعتلي ملائكته وفيه دكتور جراحة عامة ربنا جعله سبب إنه ينقذني خامس يوم العملية الأولى، ولادي كانوا متدمرين وفي المستشفى كانوا متعاطفين معايا وفعلا ربنا رب قلوب وحب الناس مش من فراغ".
وعن ارتدائها الحجاب قالت الفنانة هالة أنور: "ارتدائي الحجاب مش عائق ليا عن التمثيل، ولكن هو محجمني عن بعض الأدوار، وبعد مشاركتي في مسلسل ضل راجل، عندي مسرحية ومسلسل آخر هشارك فيه".
وأضافت: "اللي خضني إن الناس لسه فكراني وتعليقاتهم كلها إيجابية وبيشجعوني علي العودة للتمثيل بقوة، وفيه منهم من أمريكا والمغرب وتونس والجزائر والعراق ومحافظات مصر كلها وعايزني أروح لهم ضيفة كمان".
وتابعت هالة أنور: "فيه ناس اقترحت عليا البس باروكة بدلًا من الحجاب، وقالولي كده كده مغطية شعرك، وجاتلي أدوار كتير جدًا علي التوقيع بشرط لبس الباروكة بس رفضت، أنا اخدت خطوة الحجاب عن اقتناع، وعمر ما كان اللبس او الشعر مقياس للموهبة، احكموا علي أدائي ووجه جديد وأعطوني فرصة إني أثبت إني لسه موهوبة".
