محمد سعيد يكتب.. فلانتين إيه وأنا من غير ”جلب“

فى البداية بعتذر على لغة المقال، عامية صعيدية نوعًا ما، بس هى اللى تعبر عن الراجل الشرقى اللى جوايا واللى كتير بكون زهقان منه، المهم علشان مطولش.

فلانتين إيه وأنا من غير ”جلب“، بعد ما سرقتني بنت الإيه وخدته حداها، لا أنا عيل توتو ولا بتاع بابي ومامي ومحن الحريم الفاضي، أنا راجل شرقي صعيدي دمي حامي، حبيت بنت الناس وأمنت ليها سرقة ”جلبي“، وأديني أهو على حطت ايديها.

مش عاوز أعمم الموضوع وأنكد عليكوا بس واللى خلق الحب وزرعه فى قلوبنا، هى قاسية ومفترية وكل يوم بتيجي عليا، وتحرمني نظرة عنيها اللى ياما حلمت بيها، قال إيه ركز فى شغلك، مش عاوزة أعطلك عن مستقبلك الواعر، نسيت بنت ”جلبي“ إنها مستقبلي الواعر اللى استنيته سنين.

مكملناش كتير هما يدوب 26 سنة بس، عمرى ضاع وأنا بدور عليها ولما لقيتها نستني عندى كام سنة، وقسمت معايا الأه والدندنة، طلعت طماعة، خدتني في لحظة وحلفت ما ترجعني لدنيتي، كنت فاكرها جدعة وبنت أصول بس طلعت أجدع من ما كنت فاكر، أتاريني نظرى ضعيف ومش شواف.

من الأخر ومن غير رغى كتير، هى ست الحُسن والدلال وست قلبي وست الناس، مبعرفش أزوق كلام وألبس أحمر وأجيب دباديب، أصلي مَلكي بحب الأبيض لون ”جلبك“ يا صاينة عرضي وحافظة ملكي، انتى فى ”جلبي“ اللى سرقتيه.