نجلاء بدر توجه رسالة لجمهورها بعد تصريح زوجها «هطلقك لو تخنتي»
علقت الفنانة نجلاء بدر، الثلاثاء، بعد تصدرها موقع البحث جوجل على ردود أفعال الجمهور للدفاع عنها بعد تصريحات زوجها رجل الأعمال محمد عفيفي، بعد مزاحه لها بالطلاق إذ قامت بزيادة وزنها، مشيرة إلى أنه كان يمازحها من خلال البرنامج قائلة :«كان بيهزر معايا، ولو مش بيهزر كدة الجمهور عنده حق يزعل».
وقالت نجلاء : «تفاجأت بردود الأفعال من الجمهور ودفاعهم عني، ولكن حرام محمد جوزي كان بيهزر مش أكتر، وأنا عشان عارفة طبيعته وحافظة جوزي كويس جدا وعارفة انه بيهزر».
وأضافت: «عمري ما تخيلت أن الموضوع هياخد الحجم ده، ودفاع الجمهور عني، وأكيد هم عندهم حق طبعا، ولو مش بيهزر يبقى عندهم حق طبعا، ومبسوطة جدا إن الجمهور بيدافع عني وبيدافع عن أي امرأة جوزها بيقولها كده أنه «هيطلقها لو تخنت».
واختتمت :«بجد هو كان بيهزر لان دي طبيعته وبيحب الهزار جدا الحمد لله، ودي صفة جميلة جدا فيه ومتخفوش أنا زي الفل وعلاقتنا زي الفل الموضوع كان هزار مش أكتر».
تحدث محمد عفيفي، زوج الفنانة نجلاء بدر، مع زوجته خلال حوارها مع الإعلامية إنجي القاضي في برنامج «مساء dmc»، في مداخلة هاتفية، وسألته عن تقييمه لها كفنانة.
وقال زوج نجلاء بدر: «بحب فيكي إنك بتعملي تشكيلة أدوار كبيرة الفترة اللي فاتت، أدوار مختلفة ومفاجئة، أنا مش متخيل إمبارح كنت بتفرج عليكي لابسة بدلة، واحدة تخينة وعندها سمنة وصدقتك».
وسألت نجلاء بدر زوجها: «لو حصل كده في الحقيقة»، فأجاب: «هطلقك طبعا. أنا واخدك موديل معين، واخدك عربية سبور ولذيذة، تقلبي أتوبيس، هنزل المحطة الجاية على طول».
وكشف زوج نجلاء بدر عن إصابتها بتسمم غذائي قبل أيام، أثناء انشغاله في عمله، وقيامها بقيادة سيارتها للمستشفى لعمل غسيل معدة دون إعلامه، وذلك حتى لا تخرجه من تركيزه.
