كلام المصري المضروب بالكويت يشعل السوشيال ميديا

كلكم بتلومونى وبتشتمونى عشان قبلت على كرامتى أن الكويتى يضربني ووقفت ساكت إيدي في جنبي بعد كل قلم مستني القلم اللي بعده



لعلمكم انا مقبلتش أنه يضربني

انا محستش اصلا بالضرب ده

اصل انتوا متعرفوش حاجة متعرفوش أن انا وقتها كنت بفكر

فى ايه؟

فى الحلم اللى ضاع

فى السجن اللى مستنينى لو رجعت مصر

فى حسرة امى وصدمة ابويا

فى كسرة اخواتى



محدش يكلمنى عن الكرامة



انا خلصت تعليم ومكنتش لاقى أى شغل وانا واحد فقير الفقر بينهش فينا نهش الكلاب

لا عارف اشترى قميص ولا عارف اشترى جزمة ..مش لاقى أى شغل ولما لقيت شغل يادوب يكفى مصاريفى جت كورونا والراجل طردنى عشان يخفف العمالة



..وفجأة واحد يعرض عليك تسافر الكويت ..عارفين المطلوب كام ٥٠ الف جنيه ..عارفين معايا منهم كام ولا مليم ..حلم كبير هينقلنى انا وابويا وامى واخواتى من الفقر ..هريح ابويا وامى هجهز اخواتى البنات ..هشترى اللى نفسي فيه ..عارفين جبت الفلوس ازاى ..

معرفتش اجيبها طبعا وهو اللى زيي مين هيسلفه ٥٠ الف ج ..انا كتبت بيهم ١٠ إيصالات أمانة وفوقهم واحد على بياض



محدش يكلمنى عن الكرامة



عارفين يعنى ايه انى بدل ما ارجع لهم بشنطة هدايا ارجع لهم بديون وهم تقيل لناس محليتهومش حاجة يبيعوها



انا محستش باى ضرب

انا كنت متبنج ببنح الفقر وخراب البيت ..



ضربنى الراجل

وهو جبان وانا اجير

هو قادر وانا ضعيف

هو فى بلده وانا غريب

هو صاحب البيت وانا عنده ضيف



لا بس هو مضربنيش اللى كان بيضربنى الفقر والعوزة

..اللى كان بيضربنى الراجل اللى طردنى من الشغل في مصر

اللى كان بيضربنى إيصالات الأمانة



اللى كان بيضربنى الظلم والقهر

اللى كان بيضربنى فساد بلدي والكوسة والمحسوبية



انا محدش ضربني .. أنا جاي مضروب جاهز ?

#كلامصاحبالواقعة