نادر جوهر يكتب: مصر لوحدها

هناك امر عجيب في موضوع السد الاثيوبي وهو ان مصر تواجه المشكله لوحدها صحيح بوتين جمع الاطراف في موسكو وجري توافق وتم شكره ثم بعد ذلك اثيوبيا طنشت ومنفذتش حاجه فروسيا قررت انها عملت اللي عليها وخلاص متوجعوش دماغي.



امريكا دعت الاطراف وصاغت اتفاقيه وافقت ووقعت عليها مصر لكن الاثيوبيين رفضوا يوقعوا في تبجح واضح فالامريكان معملوش حاجه والاسبوع اللي فات طلعوا بيان يتمنوا فيه ان الاطراف تصل لاتفاق قبل عمليه ملأ الخزان وخلاص عندهم مشاكل تانيه.



الاتحاد الافريقي طبعا لن يقبل اي عمل عسكري ضد اثيوبيا وهيعملنا مقاطعه .



الجامعه العربيه رغم ان الامر يمس دولتين اعضاء بالجامعه لم تتحرك او تطلب اجتماع لحشد جهود المسانده لهم.

حتي السودان الشقيق دخل علي الموضوع متأخر ومش مسانده لمصر لكن علشان السد بتاعهم

الدول العربيه في الخليج خاصه الامارات والسعوديه اللي مصر بتنسق معاهم في اليمن وليبيا وقطر ليس لهم موقف قوي كأن اثيوبيا ميصحش حد يزعلها.



الاتحاد الاوروبي يبدوا ان السد علشان مفيهوش كورونا فالامر لا يعنيهم.



الله اعلم في مجلس الامن اللي قدمناله شكوي هيحصل ايه هل سيصدر قرار مايع تحاول الدول دائمه العضويه صياغته بطريقه تدعوا الي السلام والحنيه وعدم التهور.



في النهايه مصر لوحدها بس اكيد مصر الموضوع بالنسبه لها مصيري والشعب كله هيساند اي قرار سلم او حرب ولن يجرأ احد علي التهاون مع موضوع النيل بس علينا اننا نتعلم مين وقف معانا وعمل ايه ويكون لنا وقفه معاه وحساب وفِي النهايه مصر لوحدها لكن في موضوع النيل مصر هتكون جامده جدا لان ده النيل لما اخدوا مننا سيناء كل الناس عارفه احنا عملنا ايه رغم ان وقتها اقتصادنا كان واقع ومحدش بيسأل فينا فما بالك هنعمل ايه في اللي ياخد النيل.