زوجة حلمي بكر: اتهامي بخطفه مستفز ونجا من مرحلة الاحتضار

قالت سماح القرشي زوجة الموسيقار حلمي بكر: "اتهامي بخطف زوجي أمر مستفز، والأستاذ شخص لا يحجر على إرادته".

وأضافت "القرشي" خلال تصريحات تليفزيونية: "مش حقيقي وغير صحيح إني خطفت حلمي بكر، ومحض افتراءات، لو عايزين تفتروا افتروا بالمعقول واللي بعقله يستحمله".

وتابعت: "الأستاذ حلمي بكر تعبان من 3 شهور فاتوا، وكان في مرحلة الاحتضار ونجا منها وإحنا بنراعي حالته الصحية ومقصرناش".

وأكدت: "فوجئنا بأعداد كبيرة من الصحفيين عندنا بالبيت من الصبح ولحد دلوقتي وطلعوا لنا الدور التالت ولا العمارة ولا البيت مقفولين وبيتنا مفتوح لزيارة الأستاذ حلمي بكر، ولم نمنع أحدا من زيارته، والموسيقار جنبي بس هو رافض يدلي بأي تصريحات وبيقول عيب إن اسمه يزج به بهذه الطريقة وميصحش يتقال عليه إني مخطوف لإني مش عيل صغير".

وواصلت: "أوجه كلمة لكل من يقول إن حلمي بكر مختطف يا جماعة إحنا مش قادرين نودي الأستاذ المستشفى لإنه هو اللي رافض يروح المستشفى، واللي عايز يقنعه يتفضل وأنا هشيله وأوصله بعربيتي".

واختتمت: "الطبيب المعالج له استشاري القلب والأوعية قال إنه بحاجة لرعاية مركزة ولكن الأستاذ رافض الفكرة فتم وضع خطة في البيت وحولنا الأوضة بتاعته لرعاية وبعدها تحسنت صحته والطبيب قال أنتي عديتي مرحلة العناية والرعاية، وحاليا مشاكل الرئة هديت ومشاكل القلب هديت ومشاكل غسيل الكلى توقفنا بعد تحسن وظائفها ولكنه طريح الفراش وإحنا بنقلبه يمين وشمال وغير قادر على التحرك".