”فيدرا“ تدافع عن موقف محمد سلام بعد اعتذاره عن مسرحية زواج اصطناعي

دافعت الفنانة فيدرا عن الفنان محمد سلام بعد موقفه من الانسحاب، من مسرحية «زواج صناعي»، التي كان من المقرر عرضها في المملكة العربية السعودية، وتحديدًا في موسم الرياض.

فيدرا تدافع عن موقف محمد سلام
وكتبت فيدرا عبر حسابها الرسمي بموقع التواصل الاجتماعى «فيس بوك»: «عايزاكم تبقوا عارفين أن مصر والبلاد العربيه شعوبها مليانه ناس زي محمد سلام، إحنا شرفاء».

وفي منشور آخر كتبت فيدرا: «هو كسب كل حاجه علشان عمل بعقيدته، مخافش من حد، خاف من نفسه اللي حتلومه لو ما عملش وطبعا خاف من ربه، سلام مافيش منه كتير».

وأضافت: «ده واقع، وطبعا كل انسان حر وكل إنسان عارف نفسه وعارف مقدرته ولا يكلف إلا وسعها.، وسعها على الصعيد المادي والنفسي، ده وسع سلام، وده وسع باسم، وده وسع صلاح».

وأعلن الفنان محمد سلام اعتذاره عن عدم السفر للسعودية للتقديم مسرحية زواج اصطناعي في موسم الرياض بسبب أحداث فلسطين.

وكشف عن تفاصيل هذا الأمر في فيديو عبر إنستجرام قائلًا: «السلام عليكم ورحمة الله إن شاء الله المفروض أسافر الرياض عشان أعرض مسرحية زواج اصطناعي في موسم الرياض والمفروض إنها مسرحية كوميدية وفيها أغاني واستعراضات والمفروض إننا نعرض إن شاء لله يوم 30 أكتوبر».

وتابع: «هنعرض في وسط الأحداث اللي بتحصل في غزة فأنا مش متخيل إني هروح أعمل مسرحية وأهزر وأرقص وإخواتنا في فلسطين عمالين يتقتلوا ويدبحوا ومفيش حاجة بتحصلهم».

وأوضح: «أنا مش هقدر أسافر طبعًا وليه بقول الكلام ده في آخر لحظة المفروض إني أسافر بكره إن شاء الله لأني كنت على أمل إن الموسم يتلغي أو يتأجل مثل مهرجانات الجونة والقاهرة أو الموضوع يهدى في فلسطين، ونقدر نعرض لكن مفيش حاجة بتحصل لحد دلوقتي في ناس عمالة تموت ومفيش حاجة بتحصل، فأنا إزاي أروح اعرض وناس بتموت في فلسطين«.

واستكمل: «حاسس لو أنا عملت كده هبقى كأني زي اللي بقتلهم بالظبط، هبقى خذلتهم وهبقى بغني وأرقص، فأنا بعتذر عن عدم المشاركة في موسم الرياض واللي بيحصل في فلسطين قضية كل مسلم، وواجب على كل مسلم، فأنا مش في إيدي حاجة أقدر أقدمها، فلما نموت وربنا يسألنا عملت إيه لأخوك في فلسطين أنا هرد أقول إيه؟ هقول في وقت الأحداث في فلسطين أنا كنت بعمل مسرحية كوميدية وبرقص وأغني؟!، فأنا مش هقدر أعمل كده».