ماجد الحداد يكتب: ممكن تشيل معايا؟

لازم تعرف انك مجرد طفل مدلل لما ترجع لبيتك وتعمل عملية ازاحة من اللي شوفته برة من ضغوط على مراتك واولادك . سواء باهانة بكلام بذئ ، او انك تتجنن وتنعدم رجولتك وتمد ايدك على مراتك وهي لسة خارجة من معركة حربية ومعمل تربية اولادك وباقي مستلزمات البيت اللي بترجع تلاقيه _ المفروض _ في احسن حال اهل لتحقيق رغباتك في الراحة او للرفاهية .
احنا محتاجين للازاحة ده طبيعي لاننا هنلاقي نفس التوحش ده ده ساقط من الام على اولادها وهي بتزيح بالعنف والزعيق والضرب احيانا كتيرة .
كل ده حيلة إزاحة
في المقابل لما انتم تكونوا متفاهمين مع بعض ومتفقين انك لما ترحع من برة ممكن تكون متعصب عشان ضغوط خارجية وترجع تعمل ازاحة .
قل لها وفهمها من الاول اتك هترجع عاوز تفرغ شحنة ، والمشكلة مش فيها في شخصها .
وفي المقابل انت كمان لازم تستحملها في وقت هي محتاجة للازاحة عليك وتتعصب او تزعق لك بدون مبرر . انت لازم تبقى عارف ان دي ازاحة واستوعبها . او ممكن تجاربها في الخناق بس بطبقة شتوية ياسمينية يعني تكون اقل من التسونامي اللي قدامك عشان تحس انها فرغت الشحنة .
لانك لو وقفت لها الند بالند وهي بتزيح الضغط هتتحول لخناقة كبيرة حقيقية وهي اصلا كان سببها ان فيه نفس مضغوطة ومجروحة وعاوزه تشفى وترتاح بس .
دي من الرجولة على فكرة . وهي الاحتواء
الرجولة مش ندية . وحتى مع اولادك .
كل ده كوم وان الضرب يدخل قاموس البيت كوم تاني .
انسى وانسي انكم تفكروا تدخلوا الضرب في اي إزاحة او طريقة لتعليم الاخر .
ده مرفوض بتاتا لا لراجل ولا لست ولا لطفل .
ده الشئ الباقي لنا كبشر اللي يفرق بينا وبين باقي مملكة الحيوان .
يا ارقى الحيوانات.