الجمعة 23 يوليو 2021 08:54 مـ 13 ذو الحجة 1442هـ
أنا حوا

رئيس التحرير محمد الغيطي

المدير العام منى باروما

يحدث الآن
بقلم آدم وحوا

ماجد الحداد يكتب: هيرودوت والبقرة والقنفذ

أنا حوا

المؤرخ اليوناني هيرودوت في القرن الخامس قبل الميلاد بيقول أن المصريين كانوا بياكلوا لحوم طبيعي من اوز وبط و ثيران وارانب واسماك و احنا مش محتاجين مؤرخ يقول لنا لأن الآثار والنقوش تكفي لكن المشكلة أنه بيقول أن المصريين كانوا بيقدسوا البقرة وما يرضوش يذبحوها للاكل عشان هي احدى صور الست ايزيس طبعا الست اصلا مش رمزها البقرة ، هي رمزها كرسي العرش.

لكن بسبب عقدة اوديب زي ما ذكرنا كتير هي اللي خلت المصريين يدمجوا بينها وبين زوجة ابنها حت حور البقرة ، عشان كدة في مرحلة أصبحوا بينحتوا شكل الست وفوقيها قرنين .

اولا الكلام ده انثروبولوجيا ممكن يكون صحيح ... ليه ؟

لان الفلاح محتاج البقرة حية اكتر من الثور ، عشان البقرة تضمن له انتاج حيواني انها تنجب عجول ، يعني ثروة حيوانية مضاعفة ، وكمان بندر عليه لبن ، وهيعمل بيه جبنة وقشطة وزبدة و كل انواع واشكال الدهن الحيواني اللي كمان كان بيستخدمه في القلي .

إنما التور مش هيتحلب ولا هينجب ، فكدة ممكن نستفيد من لحمه ونذبحه وناكله .

المشكلة الثانية أن في قرية العمال لبناء الاهرام لقينا أنه كان بيقدم لهم وجبتين :

واحدة في الفطار عيش وبيرة .

وواحدة آخر النهار فيها لحم وز او بط او سمك او ثيران وابقار وبرضو طبعا بيرة .

وانت كبيرك دلوقتي بتقدم للصنايعي شاي وفلافل وجبنة . فين ايام زمان؟

يبقى كدة ممكن المصري عادي ياكل البقرة ، لكن التأكيد ده عندنا في عصر الدولة القديمة ، معندناش تأكيد ف بالدولة الوسطى أو الحديثة ، أو أنا لم ابحث جيدا .

لكن مش دي المشكلة اللي شغلتني !!!

اللي شغلني أن هيرودوت بيقول أن السبب امتناع المصري عن اكل البقرة أنها رمز للام المقدسة !!!

والفكرة دي هندية اصلا مش مصرية ...

المصري عملي براجماتي جدا ... يعني مثلا رغم أن هيرودوت ذكر في كتابه برضو أن المصريين كانوا يحرمون اكل الخنزير لأنه أحد صور النتر سوت رمز الفوضى والشر ، واللي بعد كدة أخذ تحريمه النبي يعقوب إسرائيل من المصريين لما حضر مصر بناء على القصة الدينية ، إلا ان المصري من عامة الشعب ظل ياكل خنزير عادي ، وكانت وجبة شهية بالنسبة له ، مفيش غير الوعاب والكهنة اللي كانوا بيحرموه على أنفسهم بس . لكن عامة الشعب لا .

فلو هيرودوت صادق كدة يبقى فيه معنى من الاتنين :

١ _ ان فرضيتي أن العقيدة البوذية كان لها اتباع ومبشرين خرجوا من الهند في العصر الهيللنستي ووصلوا الشرق الأوسط ونشروا بعض أفكارهم زي تحريم البقر ، وكمان نشر فكرة الرهبنة واعتزال الدنيا ، وافكار التناسخ اللي أثرت بشكل واضح على الفلسفة الرواقية بعد كدة في اليونان و في مصر . أو أن الباب انفتح بعد ما عمل #الاسكندر_الاكبر امبراطوريته الشرقية لحد فارس و انفتح الباب .

لكن قصة وصول النبي ماني الفارسي وأفكاره لمصر والي نشر الرهبنة عاوزة تدقيق .

٢ _ أن فيه بعض الطقوس الخاصة السرية للوعاب المصريين بدأت في التسرب للشارع المصري أو نقلها وعاب مفصولين من الخدمة الدينية وبدأت الناس تقلدهم عشان ناس مبروكين وحرموا الخنزير زيهم .

لكن ده محتاج مننا تحري الدقة في كل نقوش أو عظام الخنازير اللي نلاقيها في مقابر المصريين ... آخرها كان سنة كام بالضبط عشان نعرف التأثير ده بدأ من امتى .

المصري كمان مكانش يعرف الدجاج ، وماظهرتش عظام الدجاج الا في العصر الهيللنستي برضو ، اول كلام عن الفراخ في عهد تحوتمس الثالث تكلم عن طائر عجيب يبيض كل يوم بيضة راجع موسوعة مصر القديمة لسليم حسن المجلد الثاني

المصري كان بيحمر ويشمر ويشوي ويقلي ويسلق ويشرب.

بس اغرب أكلة اكلها المصري كانت القنفذ !!!

اي نعم احنا كنا بنتكلم القنافذ ، يغطوا القنفذة بالطين ، وبعدين يحطوه في النار ... و لما يستوي يخرجوا كرة الطين دي ويقشروها فيطلع الشوك اللي لزق في الطين وتماسك و يبقى القنفذ زي البيضة مقشرة ..

وبالهنا والشفا .

ماجد الحداد

أسعار العملات

العملةشراءبيع
دولار أمريكى​ 15.634215.7342
يورو​ 18.686018.8118
جنيه إسترلينى​ 21.765921.9130
فرنك سويسرى​ 16.809116.9239
100 ين يابانى​ 14.339314.4350
ريال سعودى​ 4.16834.1952
دينار كويتى​ 51.768852.1171
درهم اماراتى​ 4.25594.2840
اليوان الصينى​ 2.40202.4176

مواقيت الصلاة

الجمعة 08:54 مـ
13 ذو الحجة 1442 هـ 23 يوليو 2021 م
مصر
الفجر 03:28
الشروق 05:09
الظهر 12:02
العصر 15:38
المغرب 18:55
العشاء 20:24