٧٥ سنة ولسه بتشتغل.. الحاجة هنية ونور وبوسي بيقولوا لمصر: الشغل شرف مش تيك توك
في زمن بقى فيه اللي بيطلع يعمل حركات على التيك توك هو اللي بياخد الفلوس والشهرة، فيه ستات تانية خالص اختارت طريق أصعب وأشرف بكتير.
ستات اشتغلت بإيديها، وعرقت، وتعبت، وفتحت باب رزق من ولا حاجة. من غير ما تطلع عريانة، ومن غير ما تقول كابسوا كابسوا.
دول ستات مصر الحقيقية..
اقرأ أيضاً
الحاجة هنية.. 75 سنة ولسه إيديها بتبني
في ورشة صغيرة، وسط الخشب والمسامير وريحة الشغل، واقفة ست مصرية أصيلة عندها 75 سنة.. الحاجة هنية.
الحاجة هنية مش قاعدة في البيت مستنية حد يصرف عليها، ولا طالعة على السوشيال ميديا تطلب دعم.
الحاجة هنية هي النجارة اللي لسه لحد النهاردة بتعمل الطبالي بإيديها، وشغلها بيتطلب بالاسم، والناس بتيجي لها مخصوص عشان عارفة إن شغلها نضيف وأصيل.
75 سنة من الشغل والتعب، ولسه واقفة على رجليها، ولسه إيديها بتعمل، ولسه بتقول إن الشغل ستر وكرامة.
نور وبوسي.. من الجامعة الأمريكية للكروشيه
ومن الحاجة هنية، نروح لنموذج تاني خالص، بس بنفس الروح.
نور قدري وبوسي خليفة، بنتين زي القمر، خريجات الجامعة الأمريكية.
كان ممكن يقعدوا يستنوا الوظيفة ويقولوا مفيش شغل ومفيش تعيينات زي غيرهم.
لكن لأ، هما قرروا يبدأوا من الصفر.
عملوا مشروع كروشيه صغير، شغل إيديهم، حاجة جميلة ونضيفة وسعرها في متناول الكل، وأجروا بارتيشن صغير ووقفوا فيه بنفسهم يبيعوا ويعرضوا شغلهم.
بنتين متعلمين، اختاروا يشتغلوا بعرقهم بدل ما يستنوا حد يشغلهم.
هما دول المشروعات اللي تستاهل الدعم
الحاجة هنية ونور وبوسي، 3 ستات من 3 أجيال مختلفة، جمعتهم حاجة واحدة: الشغل بكرامة.
لا استنوا حد يبعت لهم هدايا، ولا طلعوا قدام الكاميرات يعملوا حركات عشان الناس تبعت فلوس. هما اشتغلوا، وتعبوا، وفتحوا باب رزق ليهم ولغيرهم.
وهما دول المشروعات الصغيرة اللي لو دعمناها بجد، منتجاتها هتوصل لكل حتة في مصر وهتتصدر بره مصر كمان.
طب نساعدهم ازاي؟.. هما لسه بادئين ومحتاجين الدولة تزقهم
الحاجة هنية ونور وبوسي مش محتاجين صدقة، هما محتاجين فرصة.
محتاجين الدولة تشوفهم وتشجعهم، لأنهم لسه بادئين ومشروعاتهم صغيرة، بس لو اتشجعت صح هتكبر وتتصدر.
ازاي نساعدهم يصدروا حاجاتهم؟
1. معارض مجانية للمشروعات الصغيرة:
بدل ما البنتين يدفعوا فلوس كتير عشان يأجروا بارتيشن، الدولة تعملهم معارض مجانية أو بسعر رمزي في كل المحافظات، ومعارض بره مصر كمان، عشان الناس تشوف شغلهم.
2. التسويق الإلكتروني والتصدير أونلاين:
نعلمهم ازاي يبيعوا على أمازون و Etsy ومواقع التصدير، ونعملهم متجر إلكتروني موحد للمشروعات الصغيرة، عشان الطبلية بتاعة الحاجة هنية والكروشيه بتاع نور وبوسي يوصل للخليج وأوروبا وهم قاعدين في مكانهم.
3. دعم من جهاز تنمية المشروعات:
قروض صغيرة بفايدة قليلة، وتدريب مجاني على التغليف والتصدير والجودة، عشان المنتج المصري يطلع شكله يشرف بره.
4. احنا كمان نساعد:
احنا كناس عادية، نشتري منهم، ونشير شغلهم، ونعملهم دعاية ببلاش. الشير الواحد منك ممكن يفتح لهم باب رزق انتي مش متخيلاه.
هما لسه بادئين، بس لو الدولة وقفت جنبهم واحنا وقفنا جنبهم، شغلهم بكرة هيتباع في كل حتة، وهيبقى مكتوب عليه صنع في مصر بفخر.
دي رسالتنا النهاردة: ادعموا اللي بيشتغل بجد.
روحوا اشتروا منهم، شجعوهم، شير للمقال ده يمكن يوصل لحد يشتري منهم ويفتح باب رزق ليهم.
لأن ستات مصر الحقيقية مش اللي على التيك توك، ستات مصر الحقيقية هما اللي في الورش والمحلات والبارتيشنات، بيبنوا بلدهم بإيديهم.
