فاطمة عمر تكتب؛ اللحمه قبل التطوير أحياناً
ذهبت إلى المعلم عباس الرطل القاطن في فيلم السفيره عزيزه كي استسمحه في أن يصبر علي قليلاً ويؤجل ثمن كيلو اللحمه الذي اشتريته شكك الشهر اللي فات وطلبت على استحياء ووشي منه في الأرض نص كيلو على النوته نظر إليّ شذراً وقال وماله يا مودام بس كده كتير والا إيه؟!
وعندما ههمت بالذهاب مصطحبة النص لحمه سألني بصوته الذي يشيب له الولدان وأخرتها هتدفعي المتأخر إمتى ؟! ووجدتني أقول له هانت يا معلم كلها شهرين والأشيه هتبقى معدن هو سعادتك لم تسمع عن ذلك القرار الصادر مؤخراً بتشكيل لجنه لتطوير الإعلام فرد نافياً جهله سمعت طبعاً يا مودام قال على رأي المثل عايز تتوه موضوع شكل له لجنه
استفزني كلامه وتحليت بشجاعة الواثق من نفسه وقلت له لااااااا الكلام ده كان زمان اللجنه دي حاجه تانيه وكمان اللجان الفرعيه التي ستنبسق منها مختلفه تماما هو حضرتك ما شوفتش عددهم أد إيه ؟! فقال شوفت وعدتهم كمان حتى بالأماره كان هتفوتني صلاة المغرب وإللي ما لقيت فيهم شاب والا شابه من ذوي الثلاثين أو الخمسه وثلاثين ربيعاً إتحمقت ورددت عليه بس لاحظ كمان يا معلم إن كلهم خبرات وقامات كبيره
لم نفسه حبتين وسألني همه هيطوروا إيه أجبته باستغراب هيطوروا الإعلام يا رطل قصدي يا معلم عباس تأفف قليلاً ثم سأل يا مودام الإعلام دي كلمه كبيره وهنا شعرت إنه راجل مثقف واستدرجته في الكلام كلمه كبيره إزاي يعني فقال يعني الجرانين الكبيره والإوذاعه والتلافزيون والمسلسلات وكدهون يعني كل ده هيطور ؟ أيوه يا معلم
وبدا يستفيض في الكلام ويشرح رؤيته عن التطوير من موقعه كمتلقي تخين وقال من محلي هذا أرى أن مفيش تطوير من غير قانون لحرية تداول المعلومات
إش إش وعرفت كمان حرية تداول المعلومات فرد ايوه طبعا أنا أصلي مصقف بالك يا مودام لو فيه القانون ده الناس هتبطل تاخد معلوماتها من الفيستوك والتيك بوك والبلاوي السوده دي ...
لا مصقف يا معلم وإيه كمان.. وضع رجلاً على رجل وبكل ألاطه اضاف لازم اللجنه تحط شروط عشان الناس اللي بتقعد على الكراسي في الإعلام يبقى معروف جت ليه وهتعمل إيه وأهم حاجه هتمشي إمتى ...وتجددوا بقى مش كده عايزين نشوف وشوش جديده والإعلام يقول لنا كلام يخش العقل لاموأخذه ونبعد عن الهري ونرجع لرأفت الهجان وجمعه الشوان وضميرأبله حكمت والحاجات الحلوه دي بدل المسلسلات اللي مليانه بلطجه وألفاظ تتندى ليها القوره
وحاجات تانيه كتييير بس أنا مش فاضي عندي زباين
وقبل كل حاجه الفلوس يعني عندك أنا مثلا لما جيت أطور الدكان كان لازم يبقى معايا فلوس انتوا كمان لما تيجوا تتطوروا لازملكم فلوس يعني تاخدوا المتأخر لكم والمعاشات كمان وتجيبوا ناس جديده تعينوهم وتلاقوا تاكلوا وتتعالجوا وتربوا عيالكم وتدفعوا اللي عليكم واخده لي بالك
أصل يا مودام اللحمه أهم من التطوير أحياناً
