هجوم ناري من أعضاء نادي وادي دجلة ضد الإدارة لهذا السبب
استغاثت سيدة من إدارة نادى وادى دجلة بفرع أسيوط لتجميدهم عضويتها وعضوية أسرتها لمجرد دخولها بـ"سناك" عبارة عن بيتزا لإبنتها الصغيرة رغم تقديمها ما يفيد بتحذير الأطباء من تناول ابنتها للطعام الجاهز.
وقالت صاحبة المشكلة مع نادي وادى دجلة: "أنا عاوزة اكتب عن مشكلة حصلت معايا في نادي وادي دجلة فرع أسيوط. كنت في النادي أنا و أسرتي و كان معانا لانش بوكس فيها بيتزا عملاها في البيت. فوجئت بواحدة من الكنترول جت وقالتلي المأكولات ممنوعة في النادي. قولتلها ان النادي بيسمح بدخول اللانش بوكس.. قعدت تجادل معايا و مع جوزي كتير بطريقة مستفزة و كل شوية تقولنا انتم مسجيبين و لا مش مستجيبين. اكننا لازم ننفذ الأمر فوراً و نسمع الكلام عشان نبقى شطار. جوزي قالها احنا مش بنخالف قواعد النادي لأن اللايحة بتسمح بدخول السناكس في لانش بوكس. هي بقى كانت مصرة ان السناكس دى مش من ضمنها البيتزا. مع اننا لما بنسافر و نروح اي فندق السناكس بيبقى وجبه خفيفة بين الوجبات الاساسية ومن ضمنها البيتزا".
وتابعت السيدة: "فوجئنا بعد الموقف ده بفترة ان واحد اتصل بجوزي و قاله انه لازم يبقى متواجد في المعاد الفولاني عشان الادارة مقدمة فينا مذكرة. جوزي راح التحقيق و حكى اللي حصل و كمان قالهم ان بنتنا الصغيرة الدكتور مانعها من الأكل من برة البيت و جابلهم الشهادات المرضية من التامين الصحي يعني لا يمكن يكون كذب اللي تثبت الكلام ده و المحقق قاله تمام. هيوصلك رد قريب. فوجئنا بعد كده برسالة مبعوته لجوزي بتقول ان العضويات بتاعتنا موقوفة لمدة 3 شهور و كان من ضمنهم رمضان و العيد. تخيلوا كل ده بسبب اننا اكلنا بيتزا من البيت!!!؟؟".
وأضافت: "المهم جوزي قدم تظلم و اتحقق معاه تاني و فالاخر التظلم اترفض. أنا مش فاهمه هو احنا اشتركنا في النادي عشان نتعامل بالطريقة المهينة دي؟؟؟ و كمان ازاي انا كمان اتوقف من غير ما يتحقق معايا؟؟؟ زي ما تكون الادارة متربصة بينا و متعمدة توقف عضويه اي حد يتكلم بالمنطق من غير ما يقول للكنترول سمعا و طاعة. أي ادارة اللي تعمل كده في أعضاء النادي؟؟؟؟ ده غير ان افراد الكنترول بيبقوا منتشرين و واقفين حرفيا عشان هدف واحد بس و هو منع أي عضو يتجرأ و يطلع أي نوع من المأكولات طالما مش من النادي سواء كانت فاكهة او ساندوتش. بيبقوا واقفين جنب الترابيزات لازقين فيها لدرجة انهم ممكن يبقوا سامعين الحديث بتاعنا. ايه تقييد الحرية ده؟؟!! صراحة عمرنا ما شوفنا نادي بيعمل كده".
