أول تعليق من أسرة والد طفل الشرقية: إحنا في صدمة.. ومفيش أم تعمل في ضناها كده

كشفت أسرة زوج السيدة المتهمة بقتل نجلها الصغير وتقطيعه إلى أجزاء بمركز فاقوس بمحافظة الشرقية، تفاصيل جديدة في الواقعة، وقال أحمد سعد، عم الطفل سعد المجني عليه: إحنا أمنّاها على ابننا لكنها قتلته.

أسرة والد طفل الشرقية تروي التفاصيل
وتابع الحاج سعد، جد الطفل سعد المقتول على يد والدته بالشرقية: كانت عايشة معانا لمدة 4 سنين، وكانت طبيعية لكنها مكانتش بتدي زوجها قدره لكنه كان صبور عليها، مكانتش بتعملّه أكل أما ييجي من الشغل وكان بيروح ياكل عند أمه، كانت بتقفل على نفسها باب البيت بالأسبوع وأنا اللي كنت بروح لها أطلعها.

وأضاف جد الطفل سعد: زوجها كان نفسه في طفل من أول ما تزوجوا، وهي قعدت سنة ونص تمتنع عن دا وتقوله مش عايزة أخلّف، لحد ما ضغط عليها وخلّفت له الطفل سعد.. سعد كان ابنهم الوحيد وأبوه كان فرحان بيه وبيجيب له كل اللي هو عاوزه.


واستكمل جد الطفل سعد: قعدت معانا لمدة 4 سنوات، وفجأة لمّيت هدومها وقالت إنها عايزة تطلق ومشيت، واشتكيناها لكبار العيلة لكن محدش كان قادر عليها، وكانت قاعدة في سكن لوحدها هي وابنها، وبعدين قتلت ابنها.

وأشار جد الطفل سعد إلى أن المتهمة كانت تصر على زوجها أن يأتي للعيش معها في مكان آخر ويترك بيت أهله ومنزل العائلة إما تطلق منه، مضيفا أنه أصابته صدمة كبيرة عندما علم بوفاة حفيده سعد بهذه الطريقة البشعة.


وأضاف عم الطفل سعد أن المتهمة خلعت زوجها وأنها كانت تمنعهم من رؤية الطفل، مشيرا إلى أن الصدمة كانت كبيرة على زوجها.