الكاتب الكبير محمد نوار يٌحاكم محمد رمضان ومسلسل البلطجة
تسمحولي اتجرأ وانقد محمد رمضان ومسلسله جعفر العمدة: نقد موضوعي ومن غير زعل: أولًا: هو صعب علي محمد رمضان ده يطلع دور راجل محترم طبيعي زي معظم الناس؟، ماينفعش يطلع غير بلطجي أو صايع أو معلم كبير بس يبقي مرابي بيسلف الناس بالفايظ؟، احنا مش هنختلف علي حب الجماهير ليه.. وتأثيره الغريب عليهم.. طب ليه ما يستغلش ده في انه يدي مثال وأمل للناس الطبيعية المحترمة عن طريق قصة كفاح شاب طبيعية مش من كوكب تاني؟، ومش لازم يبقي صايع وبلطجي وبيضرب الكل وممكن يقتل كمان عادي!.
وليه لازم يطلع يضرب ويكسر ويغرس في نفوس الناس إن أخد الحق بالدراع والضرب والبقاء للأقوي في سياسة الغابة اللي بيعلمها للي بيحبوه!، وهو ليه لازم يبقاله كلمه "واطية" أو عادة مؤرفة يستحدثها في كل عمل درامي!! زي يا ليفة وزي الملعقة بالشقلوب ديه!! حاجة مقززة!!، ليه أعماله بترسخ دايمًا عادات جديدة وتقلب موازين القيم اللي المفروض مسلم بيها ؟؟.
يعني واحد مرابي وصايع هو اللي بيحكم بين الناس وبيرتضوا حكمه؟!، ويعني ايه قانون البلطجة والاستقوا هو اللي لازم يغلب؟، هو البلد سايبة؟، ما فيه مرة يا ربي البوليس يجي أو يمسك اللي بيضرب ويبلطج! مفيش خالص؟، ليه التشجيع علي فكرة جواز الأربعة عادي كده والستات طالعين عايشين بس علشان اليوم اللي يجي دور كل واحدة فيهم فيه؟.
ليه ثريا مطلعينها حرامية أو عندها داء السرقة ومع ذلك حبوبة عادي وكلهم متصالحين مع الفكرة وعايشين عادي معاها؟
وليه نرجس بتاعت اعمال وبلاوي سودة ومع ذلك عادي برضه عايشين مع بعض مفيش أي مشكلة ومطلعينها دمها خفيف وأخر حلاوة، وليه يطلعوا دلال الزوجة اللي المفروض تبقي الزوجة اللي بتموت في جوزها من زمان واللي هي الطبيعية اللي فيهم قال، واللي المفروض تبقي مثال للمودة والرحمة والسكينة وعيلتها طيبة المفروض لولا اللي حصل لابنهم، تطلع فيها كمية الشر اللي اصلا لا يمكن تكون طبيعية؟؟، واللي كمان بتوري ان لو ضرتك مضايقاكي او اي حد مضايقك عليكي بالبلطجية وكله بالفلوس يخلص وما اسهل القتل وانتي ضميرك مرتاااح!؟ افكار ماتجيش علي بال غير المجرمين المتأصلين العتاه!؟.
وليه واحده ارستوقراطية زي عايدة الحوجة ممكن تخليها تبيع نفسها لواحد واطي معاه فلوس!، هو ده اللي بنعلمه للبنات؟ وانها كمان ايه تحبه عادي اوي؟ ازاي يعني؟ ما بتقرفش من عاداته وطريقة اكله وشربه ولبسه وريحته؟!، لا الفلوس اهم طبعا!.
وصفصف ديه بالرغم ان دمها خفيف، بس بتشجع الحموات علي قلة الادب وشتيمة مرات ابنها عادي!! وتضربها كمان ما يضرش؟؟ لا ولازم البنت تطبلها علشان ترضي عنها!.
ولا النيلة اللي اسمها وداد ديه مطلعين عادي خالص، تخلعي جوزك وتعيشي معاه في الحرام لحد ماتلاقي غيره ولا فيه حسيب ولا رقيب وكبيرها اخدت قلم من سيد لما التاني رماها وعقاابها طبعًا حايكون ان فلوسها حاتتسرق وخلاص!؟ والأغرب ان اللي اتجوزها عادي عارف انها كانت معاشرة طليقها في الحرام شوفوا الأفكار!؟ بالذمة ده مش حرام!، ايه كم القرف والباكابورت اللي اتفتح علينا ده؟، سيبكوا ان القصة مشوقة وتشد علشان موضوع ابنه ده، بس اللي يتعمق ويشوف بنظرة عميقة شوية ويشوف السم اللي محطوط في العسل والقيم الجديدة اللي بتتزرع في اذهان الناس .. هيفهم انا قصدي ايه! مع كامل احترامي للكل.
انا كمان اتفرجت علي المسلسل والحاجة الوحيدة اللي خليتني اشوفه كم الاعجاب من ناس كتير منهم اصدقاء محترمين باحترم رأيهم قولت أما أشوف الأعلى مشاهدة ده واللي فيه حي في القاهرة وزعوا شربات لما جعفر خرج من السجن!، بس مع كامل احترامي لرأيهم.. انا شايف إن النوع ده من الاعمال بيدبح بدم بارد كل القيم والاخلاق والعادات الحميدة اللي اتربينا عليها واتعرف بيها مجتمعنا المصري المحترم، وبيزرع وبيرسخ قيم ومبادئ جديدة هخلينا نعاني السنين اللي جاية، ولا حول ولا قوة الا بالله.
