فتة العدس من الأكلات الشتوية الجميلة بريحة وطعم يفتح النفس

يقدم مطبخ "أنا حوا" طريقة بسيطة وسهلة لعمل فتة العدس بالخل والثوم، كأفضل الأصناف التى يقبل عليها الناس فى فصل الشتاء، مع انخفاض درجات الحرارة.

* مكونات العدس
كوب عدس مغسول ومتصفي
٢ جزرة كبيرة متقطعة
بصلة متوسطة متقطع
طمطماية متقطعة
فصين توم
٢ كوب مياه
شعرية
ملح وكمون وبابريكا
شطه حسب الرغبه
زبده أو سمنه وزيت

* إضافات اختياري
بطاطس
كوسه

* الطريقة
في حله على النار هنحط العدس والجزر والبصل والطماطم والتوم والمياه ونسيبهم لحد ما تستوي ونطفي ولما يبرد هنضرب بالهاند بليندر أو نضربه في الخلاط ونصفي، ونجيب حله نحط فيها زبده وزيت وننزل الشعريه نحمرها وننزل عليها الشوربه مع التقليب لحد ما الشعريه تستوي ونظبط التوابل.

* العيش "الخبز"
عيش بلدي متقطع مربعات بالسكينة أو بالمقص ونوزع عليه معلقة سمنة ومعلقة صغيرة توم مفروم ورشة ملح ونقلبه وندخله تحت الشوايه يتحمص.

* الأرز
كوب رز
كوب مياه
معلقه صغيره ملح
سمنه وزيت

* الطشه
معلقه كبيره توم مفروم
معلقه كبيره سمنه
معلقه صغيره كسبره
معلقتين كبار خل

* طريقة الأرز
في حله على النار هنحط سمنه وزيت وننزل الأرز نقلبه وبعدين نضيف المياه والملح ونسيبه يستوي.

* طريقة الطشه
في طاسه على النار هنحط سمنه وننزل عليها التوم ونقلب لما ياخد اللون الدهبي هنضيف الكسبره ونطفي ونضيف الخل وتتوزع على الفته على طول.

* ترتيب الفته
هنحط العيش وعليه شوربة عدس ونغطي عليه خمس دقايق وبعدين نوزع الأرز ونعمل الطشه وننزلها على الأرز ونزين بعيش محمص وبألف هنا.