«اتفتح عليها مطواة».. حسام حبيب يكشف كواليس صادمة فى نقل شيرين للمستشفى

كشف الفنان حسام حبيب كواليس ليلة نقل النجمة شيرين عبد الوهاب إلى أحد المستشفيات المتخصصة في علاج حالات الإدمان.

وقال "حبيب" خلال تصريحات تليفزيونية، مساء الجمعة: "الليلة اللي خدوا فيها شيرين عبد الوهاب كانوا فاتحين مطواة، وشدوها من شعرها واتسحلت على الأرض واترمت في عربية، كان فيه مطواة مفتوحة عليَّ وسحلوها وشدوها من شعرها وهي لابسة بيجامة، وقعدت تصوت وتصرخ وتقولي الحقني يا حسام".

وأضاف: "حاولت أتفاهم معاهم مفيش فايدة، قلت له هي في وعيها وطلعت مع إسعاد يونس بشكل كويس، وفي حفلة الرئيس ظهرت بشكل كويس، وأخوها فضل يشتمها وقالت له أنا شيرين عبد الوهاب أنا أختك اللي عالجتك لسنين طويلة ووقفت معاك تعمل فيَّ كده، وحاولت آخدها منهم اتضربت واتكتفت ودراعاتي كلها مشروخة وما رضيتش أعمل محضر علشان قالوا لي أنت كدا هتأذيها، ولما أخوها جه ياخدها كان معاه واحد صاحبه وشيرين كانت عرفاه واسمه بكر، والواقعة وصلت لمدة ساعة، وأخدوا التليفونات من البنت إلى شغالة مع شيرين، وكنا قاعدين بنجهز لشغل وفيه شاعر ومنتج كانوا جايين لينا".

وتابع الفنان حسام حبيب: "شدوها مني وأخدوها ومشيوا، سببوا لي عقدة بسبب مشهد فتح مطواة عليها وضربها وسحلها، والشقة اللي أخدتها في التجمع كانت إيجار علشان تبقى قريبة في الشغل".

ولفت: "لما أخدوا شيرين بقيت بجري في الشارع، وأخوها بعد لما أخدها رمى لي التليفون في الشارع، وما رضيتش وقتها أبلغ الشرطة علشان ما أعملش عليها شوشرة، وبعد لما نزلت مروحتش المستشفى بتاعت شيرين عبد الوهاب وقعدت 4 أيام ما بصيحهاش لأني كنت مفزوع من ضربي وبهدلتي، لحد لما جالي تليفون من سارة الطباخ وكانت مفكرة إن شيرين جايلها رباط صليبي فقلت لها لأ شيرين مش كويسة وحكيت لها القصة"، مشيرًا إلى: "محامي شيرين عبد الوهاب كلمني وقال لي أشهد عن كواليس الواقعة وأنا ما روحتش لها المستشفى ولا وقفت تحت وشاورت لها".